දේශයේ නිදහස වෙනුවෙන් දිවිපිදූ වීරෝදාර රණවිරුවන්ට සහ මෑතකදී බලපෑ ‘දිට්වා’ සුළි කුණාටුව හේතුවෙන් දැයට අහිමි වූ ශ්රී ලාංකික පුරවැසි ජීවිතවලට ජීවමාන උපහාරයක් පිදීම වෙනුවෙන් ශ්රී ලංකා යුද්ධ හමුදාව සංවිධානය කරන ‘හුස්මෙන් හුස්මක් – විරු තුරු සෙවණ’ ජාතික රුක් රෝපණ ව්යාපෘතිය අද (22) සිට ආරම්භ වේ. ආරක්ෂක සේනා මූලස්ථාන මඟින් දිවයිනේ බොහෝ දිස්ත්රික්ක ආවරණය වන පරිදි ක්රියාත්මක කෙරෙන මෙම විශේෂ හරිත මෙහෙයුම එළැඹෙන ජුනි මස 04 වැනිදා දක්වා පැවැත්වීමට සැලසුම් කර තිබේ.
සුළි කුණාටුව හේතුවෙන් මෙරට පරිසර පද්ධතියට සිදු වූ දැවැන්ත හානිය යළි ප්රතිස්ථාපනය කිරීම සහ ‘ක්ලීන් ශ්රී ලංකා’ ජාතික මෙහෙවරෙහි අරමුණු සාර්ථක කරගැනීම මෙහි ප්රධාන අරමුණයි. මෙම වැඩසටහන් මාලාවේ සමාරම්භක උත්සවය අද (22) කුරුණෑගල ගනේවත්ත ඔසු උයනේදී පැවැත්වෙන අතර, ඒ සඳහා ප්රධාන ආරාධිත අමුත්තා ලෙස යුද්ධ හමුදාධිපති ලුතිනන් ජෙනරාල් ලසන්ත රොද්රිගෝ මහතා සහභාගී වීමට නියමිතය. එහිදී දිවයින පුරා දියත් වන සමස්ත ව්යාපෘතියට සංකේතාත්මක ප්රවේශයක් ලබා දෙමින් පැළ 300ක් රෝපණය කිරීම සිදු කෙරේ.
රටේ සුරක්ෂිතභාවය මෙන්ම මතු පරපුර වෙනුවෙන් ස්වාභාවික ව්යසනයන්ගෙන් තොර, නිසි කලට වැසි වසින හරිත පරිසරයක් නිර්මාණය කිරීම තම වගකීමක් ලෙස සලකන ශ්රී ලංකා යුද්ධ හමුදාව, මෙම පුණ්යකර්මය සඳහා දිවිපිදූවන්ගේ ළඟම ඥාතීන් ද සම්බන්ධ කරගෙන ඇත. තවද, මෙම ජාතික මෙහෙවර සාර්ථක කරගැනීම සඳහා දිවයින පුරා වෙසෙන රාජ්ය නිලධාරීන්, විශ්වවිද්යාල සහ පාසල් සිසුන් ඇතුළු සමස්ත සිවිල් ජනතාවගේ පූර්ණ සහයෝගය ද අපේක්ෂා කෙරේ.
