මෙරට පුද්ගලයකුට සිය අවම මූලික අවශ්යතා සපුරා ගනිමින් දරිද්රතාවයෙන් මිදී ජීවත් වීම සඳහා මසකට අවශ්ය අවම පිරිවැය දැක්වෙන “නිල දරිද්රතා රේඛා සටහන” ජනලේඛන හා සංඛ්යාලේඛන දෙපාර්තමේන්තුව විසින් යාවත්කාලීන කර තිබේ. 2026 මාර්තු මාසය සඳහා නිකුත් කර ඇති මෙම වාර්තාවට අනුව, ජාතික මට්ටමින් පුද්ගලයකුට මසකට අවශ්ය අවම මුදල රුපියල් 16,690ක් ලෙස සටහන් වේ. එය 2026 පෙබරවාරි මාසයේ පැවති රුපියල් 16,571ක අගයට වඩා ඉහළ යාමකි.
මෙම දරිද්රතා රේඛා අගය දිස්ත්රික් මට්ටමින් වෙනස් වන අතර, ඒ අනුව දිවයිනේ වැඩිම ජීවන වියදමක් සහිත දිස්ත්රික්කය ලෙස කොළඹ දිස්ත්රික්කය වාර්තා වී ඇත. කොළඹ ජීවත් වන පුද්ගලයෙකුට දරිද්රතා මට්ටමට වඩා ඉහළින් සිටීමට නම් 2026 මාර්තු මාසය වන විට මසකට අවම වශයෙන් රුපියල් 18,000ක මුදලක් අවශ්ය වේ. පෙබරවාරි මාසයේදී කොළඹ දිස්ත්රික්කයේ මෙම අගය සටහන් වූයේ රුපියල් 17,872ක් ලෙසිනි.
මේ අතර, මෙරට දිස්ත්රික්ක 25 අතුරින් අඩුම දරිද්රතා රේඛා අගයක්, එනම් ජීවත් වීමට සාපේක්ෂව අඩුම මුදලක් අවශ්ය දිස්ත්රික්කය ලෙස මොණරාගල දිස්ත්රික්කය වාර්තා වී ඇති අතර එහි අගය රුපියල් 15,958කි. මොණරාගල හැර සෙසු සියලුම දිස්ත්රික්කවල දරිද්රතා රේඛා අගය රුපියල් 16,000 සීමාව ඉක්මවා ගොස් ඇත. පෙබරවාරි මාසයට සාපේක්ෂව මාර්තු මාසයේදී ජාතික පාරිභෝගික මිල දර්ශකය (NCPI) ඉහළ යාම මෙම නිල දරිද්රතා රේඛාවේ පිරිවැය වැඩිවීමට ප්රධානතම හේතුව වී ඇති බව ජනලේඛන හා සංඛ්යාලේඛන දෙපාර්තමේන්තුව පෙන්වා දෙයි.
