ශ්රී ලංකාවේ ලිහිසි තෙල් (Lubricant) කර්මාන්තය සඳහා විධිමත් නියාමන රාමුවක් සකස් කරන බවට 2023 වසරේදී නිල වශයෙන් ප්රකාශ කර තිබුණ ද, වසර තුනකට ආසන්න කාලයක් ගතවන තුරුත් එම සැලසුම් ක්රියාත්මක නොවීම හේතුවෙන් සමස්ත ක්ෂේත්රයම මේ වන විට දැඩි අවිනිශ්චිතතාවකට මුහුණ දී සිටී. පසුගිය රජය ලබා දුන් මෙම පොරොන්දුව ඉටු කිරීමට අපොහොසත් වූ අතර, වත්මන් පාලනය ද මේ දක්වා ඒ පිළිබඳව පැහැදිලි නීතිමය ස්ථාවරයක් ප්රකාශ කර නොමැති වීම ක්ෂේත්රයේ ප්රධාන පාර්ශ්වකරුවන්ගේ දැඩි කනස්සල්ලට හේතු වී තිබේ. නිසි අධීක්ෂණ පද්ධතියක් සහ නීතිමය ව්යුහයක් නොමැති වීම හේතුවෙන් ව්යාජ මෙන්ම අනවසර වෙළෙඳුන් බිහි වන බවත්, එමඟින් රජයට ලැබිය යුතු විශාල බදු ආදායමක් අහිමි වන බවත් ෂෙව්රොන් ලුබ්රිකන්ට්ස් (Chevron Lubricants) සමාගමේ කළමනාකාර අධ්යක්ෂ සහ ප්රධාන විධායක නිලධාරී බර්ට්රම් පෝල් මහතා පෙන්වා දෙයි.
ඛනිජ තෙල්, ද්රව පෙට්රෝලියම් ගෑස් (LPG) සහ ලිහිසි තෙල් ක්ෂේත්රයන් අධීක්ෂණය කිරීම සඳහා නව නියාමන ආයතනයක් පිහිටුවීමේ අරමුණින් 2024 වසරේ දෙවන කාර්තුවේදී විදුලිබල හා බලශක්ති අමාත්යාංශයේ ලේකම්වරයාගේ ප්රධානත්වයෙන් කමිටුවක් පත් කෙරුණු අතර, එහිදී ශ්රී ලංකා මහජන උපයෝගිතා කොමිෂන් සභාව (PUCSL) අතුරු නියාමකයා ලෙස පත් කිරීමට ද කර්මාන්තකරුවන් සමඟ පැවැති සාකච්ඡාවලදී යෝජනා විය. කෙසේ වෙතත්, ඉන් අනතුරුව පැවැත්වුණු ජනාධිපතිවරණය සහ මහ මැතිවරණය වැනි දේශපාලන ක්රියාවලීන් හේතුවෙන් මෙම ප්රතිසංස්කරණ කටයුතු සම්පූර්ණයෙන්ම ප්රමාද වූ බව ක්ෂේත්රයේ පොදු පිළිගැනීමයි. මේ අතරතුර, ලිහිසි තෙල් සමාගම් විසින් සිය බලපත්ර ගාස්තු විදුලිබල හා බලශක්ති අමාත්යාංශය වෙත දිගින් දිගටම ගෙවනු ලැබුවද, ඔවුන් වෙතින් ලැබිය යුතු සහය සේවාවන් මේ වන විට සම්පූර්ණයෙන්ම අත්හිටුවා තිබීම ගැටලුකාරී වේ.
විශේෂයෙන්ම, මෙරට ලිහිසි තෙල් වෙළෙඳපොළේ ප්රවණතා සහ සමාගම්වල වෙළෙඳපොළ කොටස් නිරීක්ෂණය කරමින් කාර්තුවකට වරක් නිකුත් කෙරෙන නිල වාර්තාව අවසන් වරට ලැබී ඇත්තේ 2023 වසරේ තුන්වන කාර්තුවේදී වන අතර, එය මාස 18 කින් යාවත්කාලීන වී නොමැත. සෑම ආයතනයක්ම තමන්ගේ විකුණුම් දත්ත නිසි පරිදි රජයට වාර්තා කරද්දී මෙවැනි වාර්තා නිකුත් නොවීම බරපතළ වෘත්තීය ගැටලුවක් බව බර්ට්රම් පෝල් මහතා අවධාරණය කරයි.
