ඉන්දීය ප්රිමියර් ලීග් (IPL) තරගාවලියේ තීරණාත්මක තරගයකදී රෝයල් චැලෙන්ජර්ස් බැංගලෝරු (RCB) කණ්ඩායම පරදා සන්රයිසස් හයිද්රාබාද් (SRH) කණ්ඩායම ලකුණු 55 ක විශිෂ්ට ජයක් ලැබීමෙන් අනතුරුව, සුපිරි ක්රීඩක විරාත් කෝලි (Virat Kohli) සහ ඔස්ට්රේලියානු පිතිකරු ට්රැවිස් හෙඩ් (Travis Head) අතර පිටියේදී දැඩි උණුසුම් තත්ත්වයක් හටගෙන තිබේ. තරගය නිමාවීමෙන් පසු දෙපිලේ ක්රීඩකයන් සාම්ප්රදායිකව අතට අත දෙන අවස්ථාවේදී, ට්රැවිස් හෙඩ් තමන් වෙත දිගු කළ දෑත මඟහරිමින් කෝලි ඔහු පසුකර ඉදිරියටම ගමන් කිරීම මෙහිදී විශේෂ අවධානයට ලක්විය.
හයිද්රාබාද් කණ්ඩායම ලබාදුන් ලකුණු 256 ක දැවැන්ත ඉලක්කයක් හඹායෑම සඳහා බැංගලෝරු කණ්ඩායමේ ආරම්භක පිතිකරු ලෙස විරාත් කෝලි පිටියට පිවිසි අවස්ථාවේදී ද මොවුන් දෙදෙනා අතර වාචික ගැටුමක් (Sledging) ඇති විය. එහිදී දැඩි කෝපයෙන් පසු වූ කෝලි, තමන්ට පන්දු යැවීම සඳහා පැමිණෙන ලෙස ට්රැවිස් හෙඩ් වෙත සංඥාවෙන් අභියෝග කළේය. එපමණක් නොව, පිතිකරණයෙන් පසු හයිද්රාබාද් කණ්ඩායම විසින් හෙඩ් වෙනුවට ‘ඉම්පැක්ට් ප්ලේයර්’ (Impact Player) නීතිය යටතේ විශේෂඥ පන්දු යවන්නෙකු ආදේශ කිරීම උපහාසයට ලක් කරමින් කෝලි පිටිය තුළදී විශේෂ සංඥාවක් ද සිදු කරනු ලැබීය.
කෙසේ වෙතත්, කෝලිගේ මෙම අභියෝගය භාර ගැනීමට හෙඩ්ට වැඩි කාලයක් ඉතිරි නො වූයේ කෝලි පන්දු 11 කදී ලකුණු 15 ක් පමණක් ලබා සිටියදී ඉක්මනින්ම දැවී යාම හේතුවෙනි. නමුත් පසුව පන්දු යැවීමට පැමිණි ට්රැවිස් හෙඩ්, බැංගලෝරු කණ්ඩායමේ නායක රජත් පටිදාරගේ (Rajat Patidar) තීරණාත්මක කඩුල්ල දවා ගැනීමට සමත් විය. සිකුරාදා (ඊයේ) පැවැත්වුණු මෙම තරගයේ ජයග්රහණයත් සමඟ හයිද්රාබාද් කණ්ඩායම ප්රසාද ලකුණු සටහනේ තෙවැනි ස්ථානය දක්වා ඉදිරියට පැමිණ බැංගලෝරු කණ්ඩායම සමඟ සම ලකුණු ලබා සිටියද, ශුද්ධ ලකුණු වේගය (Net Run Rate) මත බැංගලෝරු කණ්ඩායම තවදුරටත් ලකුණු සටහනේ පෙරමුණේ පසුවේ. එළඹෙන බදාදා ආරම්භ වන IPL තරගාවලියේ අවසන් වටය (Playoffs) සඳහා කණ්ඩායම් දෙකම මේ වන විටත් සුදුසුකම් ලබා ගෙන තිබේ.
