බටහිර යුක්රේනයේ ටෘස්කාවෙට්ස් (Truskavets) නගරය ආසන්නයේ පිහිටි විවෘත පිට්ටනියකදී, උණ්ඩයක හැඩය ගත් ‘P1-SUN’ වර්ගයේ ද්රෝන යානයක් සිය ඉලක්කය වෙත වේගයෙන් ඇදී ගියේය. තවත් ද්රෝන යානයක් මඟින් ඇදගෙන ගිය බැලුනයක රැහැන සාර්ථකව කපා දැමීමට එය සමත් වෙද්දී, බලා සිටි සෙබළුන්ගෙන් ප්රීති ඝෝෂා නැඟුණි.
යුක්රේන හමුදාවේ සිටින අතිදක්ෂතම ද්රෝන නියමුවන් පිරිසක් මේ දිනවල තරඟ වදින්නේ රුසියානු සතුරන් සමඟ නොව, තම ඒකකයන් වෙනුවෙන් නවීනතම ද්රෝන තාක්ෂණික මෙවලම් දිනාගැනීමේ අරමුණින් එකිනෙකා සමඟය. යුක්රේන ආරක්ෂක අංශවල විශිෂ්ටතම බලඇණි 19ක් නියෝජනය කරන නියමුවන් සහ ඉදිරිපෙළ සටන් සඳහා ද්රෝන නිෂ්පාදනය කරන සමාගම් ඒකාබද්ධව මෙම “වයිල්ඩ් ද්රෝන්ස්” (Wild Drones) තරඟාවලිය සංවිධානය කර තිබේ.
වත්මන් යුක්රේන යුද පිටියේ ගමන්මඟ සම්පූර්ණයෙන්ම වෙනස් කිරීමට ද්රෝන තාක්ෂණය සමත් වී ඇත. යුද පෙරමුණෙන් බොහෝ ඈත තොටිලක සිට වීඩියෝ ගේම් කොන්සෝල (Video Game Consoles) ආධාරයෙන් පුපුරණ ද්රව්ය රැගත් ද්රෝන මෙහෙයවන තරුණ සෙබළුන්, සතුරු හමුදාවන්ට දැඩි භීතිකාවක් ගෙන දීමට සමත්ව සිටිති.
මෙම තරඟාවලිය හරහා විවිධ යුද ඒකකවල සිටින නියමුවන්ට එකිනෙකා හමුවී අත්දැකීම් බෙදා ගැනීමට මෙන්ම, ද්රෝන නිෂ්පාදකයින් විසින් හඳුන්වා දෙන නවතම තාක්ෂණික මෙවලම් පිළිබඳව සෘජුවම දැකබලා ගැනීමටත් සුවිශේෂී අවස්ථාවක් හිමිවන බව තරඟාවලිය සංවිධානය කළ 93 වන යාන්ත්රික බලඇණියේ ‘බ්ලැක් රේවන්’ ද්රෝන ඒකකයේ සැරයන් මේජර්වරයා (හමුදා සංකේත නාමය “ග්රේ”) ප්රකාශ කර සිටියි.
