රුපියල අවප්රමාණය වීම සම්බන්ධයෙන් වත්මන් ආණ්ඩුව ඉදිරිපත් කරන කරුණු තාක්ෂණිකව සාවද්ය බවත්, පවතින ආර්ථික අර්බුදයට සැබෑ හේතුව ආණ්ඩුවේ වැරදි ආර්ථික තීන්දු සහ දේශීය ආර්ථික පදනම බිඳවැටීම බවත් පෙරටුගාමී සමාජවාදී පක්ෂයේ අධ්යාපන ලේකම් පුබුදු ජයගොඩ මහතා පවසනවා. නුගේගොඩදී පැවැති මාධ්ය සාකච්ඡාවකදී ඔහු මේ බව සඳහන් කළා.
ඇමරිකානු ඩොලරය ශක්තිමත් වීම සහ මැදපෙරදිග යුද තත්ත්වය හේතුවෙන් රුපියල අවප්රමාණය වූ බවට ආණ්ඩුව කරන ප්රකාශ ප්රතික්ෂේප කරන ඒ මහතා, ජාත්යන්තර මට්ටමින් ඩොලරයේ බලපෑම ක්රමයෙන් අඩු වෙමින් පවතින බව ද පෙන්වා දෙනවා. ආණ්ඩුව ජාත්යන්තර මූල්ය අරමුදලේ නව ලිබරල් ආර්ථික ප්රතිපත්ති අන්ධ ලෙස අනුගමනය කිරීම සහ වාහන ආනයන සීමා ලිහිල් කිරීම හේතුවෙන් විදේශ විනිමය සංචිතවලින් ඩොලර් බිලියන 2.4ක් රටට අහිමි වී ඇති බවයි ඔහු වැඩිදුරටත් කියා සිටින්නේ.
ආනයනය කළ වාහන ලක්ෂ තුනෙන් බස් රථ ඇත්තේ 700ක් වැනි සුළු ප්රමාණයක් බවත්, ඉතිරි බහුතරය අධි සුඛෝපභෝගී පෞද්ගලික වාහන බැවින් ඉන්ධන පරිභෝජනය ද ශීඝ්රයෙන් ඉහළ ගොස් ඇති බවත් ඔහු අනාවරණය කරනවා. ඩොලරයේ මිල ඉහළ යාමෙන් අපනයනකරුවන්ට වාසියක් ලැබුණ ද, ඉන් සාමාන්ය ශ්රමිකයන්ගේ ආදායමෙහි කිසිදු වර්ධනයක් සිදු නොවන බව ද ඔහු පෙන්වා දෙනවා.
අත්යවශ්ය භාණ්ඩ මිල ඉහළ යාම හේතුවෙන් මේ වන විට පීඩාවට පත්ව ඇත්තේ පහළ පන්තියේ ජනතාවයි. ඉන්දියානු රුපියලේ කඩා වැටීම පෙන්වා ආණ්ඩුව තමන්ගේ වැරදි වසා ගැනීමට උත්සාහ කරන බව පවසන ජයගොඩ මහතා, එදා ජනාධිපති අනුර කුමාර දිසානායක මහතා පාලකයන්ගෙන් ඇසූ ප්රශ්නයම අද ජනතාව ඔහුගෙන් ඇසීමට පෙර, ධනපතියන් පිනවන මෙම ජනතාද්රෝහී ආර්ථික ක්රමය වෙනුවට ජනතාවාදී විකල්ප ආර්ථික වැඩපිළිවෙළකට ගමන් කරන ලෙස ආණ්ඩුවට බලකර සිටිනවා.
