මැතිවරණ නීති (පළාත් සභා ඡන්ද විමසීම් හැර) සමාලෝචනය කර පාර්ලිමේන්තුවට වාර්තා කිරීම සඳහා පත් කර ඇති විශේෂ පාර්ලිමේන්තු කාරක සභාව, සිය කටයුතු සඳහා මහජන අදහස් ලබා ගැනීමට තීරණය කර තිබේ. කාරක සභාවේ සභාපති අමාත්ය මහාචාර්ය චන්දන අබයරත්න මහතාගේ ප්රධානත්වයෙන් පාර්ලිමේන්තුවේදී පළමුවරට රැස් වූ අවස්ථාවේදී මෙම තීරණයට එළඹිණි.
ඡන්ද හිමියන් ලියාපදිංචි කිරීමේ පනත, පළාත් පාලන ආයතන ඡන්ද විමසීම් පනත, පාර්ලිමේන්තු මැතිවරණ පනත සහ ජනාධිපතිවරයා තෝරා පත් කර ගැනීමේ පනත ඇතුළු මැතිවරණ නීති සහ ඒ හා සම්බන්ධ සංශෝධන ගැඹුරින් අධ්යයනය කිරීම.
පවතින නීති ප්රතිශෝධනය කිරීමේ, සංශෝධනය කිරීමේ සහ ඒකාබද්ධ කිරීමේ අවශ්යතාවය ඇගයීම මෙන්ම නව ප්රතිසංස්කරණ සඳහා නිර්දේශ ඉදිරිපත් කිරීම.
කාරක සභාවට අවශ්ය ඕනෑම පුද්ගලයෙකු කැඳවීමට, සාක්ෂි ලබා ගැනීමට සහ අවශ්ය ඕනෑම ලේඛනයක් හෝ වාර්තාවක් කැඳවීමට බලය හිමි වේ.
අදාළ ක්ෂේත්රවල විශේෂඥ දැනුම ඇති පුද්ගලයන්ගේ සහ ප්රවීණයන්ගේ දායකත්වය ලබා ගැනීමට කාරක සභාවට හැකියාව පවතී.
සමාලෝචන ක්රියාවලිය පිළිබඳව මහජනතාව දැනුවත් කිරීමට සහ ඒ සඳහා පුළුල් මහජන සහභාගීත්වයක් ලබා ගැනීමට සාමාජිකයන් එකඟතාව පළ කර ඇත.
මෙම කාරක සභාව සඳහා නියෝජ්ය අමාත්ය සුනිල් වටගල මහතා ඇතුළු පාර්ලිමේන්තු මන්ත්රීවරුන් වන රවී කරුණානායක, ජේ.සී. අලවතුවල, හර්ෂණ රාජකරුණා, කදිරවේලු ෂන්මුගම් කුගදාසන්, රුවන්තිලක ජයකොඩි, තුෂාරි ජයසිංහ සහ චන්දිම හෙට්ටිආරච්චි යන මහත්ම මහත්මීහු සහභාගී වූහ.
