ලංකා ගල්අඟුරු සමාගම විසින් නියම කරන ලද ප්රමිතීන්ට පටහැනි, සම්පූර්ණයෙන්ම ප්රතික්ෂේප කළ යුතු මට්ටමේ බාල ගල්අඟුරු රැගත් නෞකාවක් කොළඹ වරායට ආසන්න මුහුදු සීමාවේ නැංගුරම් ලා ඇති බව “ෆ්රී ලෝයර්ස්” සංවිධානය විශේෂ නිවේදනයක් නිකුත් කරමින් පවසයි.
කෙසේ වෙතත්, මෙම චෝදනා ප්රතික්ෂේප කරන බලශක්ති අමාත්යවරයා පවසන්නේ අදාළ ගල්අඟුරු තොගය ප්රමිතියෙන් බාල වුව ද එය නොරොච්චෝලේ බලාගාරයේ විදුලි උත්පාදනය සඳහා භාවිත කළ හැකි බවයි.
අදාළ නෞකාවේ පැටවුම් වාර්තාවේ (Loading Report) පිටපත් පසුගිය අප්රේල් 30 වැනිදාම බලශක්ති අමාත්යාංශයේ ලේකම්වරයා ඇතුළු නිලධාරීන්ට යොමු කර තිබූ බව එම සංවිධානය පෙන්වා දෙයි. දකුණු අප්රිකාවේ ‘රිචර්ඩ් බේ කෝල් ටර්මිනල්’ වරායේ සිට පැමිණ ඇති මෙම නෞකාවේ ගල්අඟුරු මෙට්රික් ටොන් 59,766ක් අඩංගු වේ. එහි අළු ප්රතිශතය (Ash Content) ඒකක 16.8ක් ලෙස සටහන්ව ඇති අතර, එය ලංකා ගල්අඟුරු සමාගමේ ටෙන්ඩර් කොන්දේසිවල උපරිම අගය වන ඒකක 16 සීමාව ඉක්මවා යෑමකි. මේ හේතුවෙන් දඩ මුදලක් අය කරමින් හෝ මෙම තොගය භාරගැනීමට ගල්අඟුරු සමාගමට කිසිදු නීත්යානුකූල හැකියාවක් නොමැති බව ඔවුහු අවධාරණය කරති.
මේ සම්බන්ධයෙන් මාධ්ය වෙත අදහස් දක්වමින් බලශක්ති අමාත්ය මහාචාර්ය අනුර කරුණාතිලක මහතා ප්රකාශ කළේ, අදාළ ගල්අඟුරු තොගයේ ප්රමිතිය පිළිබඳ ගැටලුවක් තිබුණ ද, එය නොරොච්චෝලේ ලක්විජය ගල්අඟුරු බලාගාරයේ විදුලි ජනන කටයුතු සඳහා භාවිත කිරීමට තාක්ෂණික වශයෙන් බාධාවක් නොමැති බවයි. ටෙන්ඩර් පටිපාටිය උල්ලංඝනය කිරීම සම්බන්ධයෙන් සැපයුම්කරුට එරෙහිව නීතිමය ක්රියාමාර්ග ගැනීමට දැනටමත් පියවර ගෙන ඇති බව ද අමාත්යවරයා සඳහන් කළේය. වැඩිදුරටත් අදහස් දැක්වූ අමාත්යවරයා කියා සිටියේ විවිධ සංවිධාන දේශපාලන වාසි තකා මෙම නෞකාව සම්බන්ධයෙන් අසත්ය ප්රකාශ පතුරවමින් සිටින බවයි.
