ශ්රී ලංකාවේ වාර්ෂික සීනි අවශ්යතාවයෙන් 90%ක් පමණම විදේශයන්ගෙන් ආනයනය කිරීමට සිදුවීම හේතුවෙන් වසරකට වැයවන අතිදැවැන්ත විදේශ විනිමය ප්රමාණය මෙරට ඉතිරි කරගනිමින් දේශීය උක් වගාව සහ සීනි නිෂ්පාදනය ඉහළ නැංවීම සඳහා බ්රසීල රජයේ සෘජු සහාය ඇතිව විශේෂ ව්යාපෘතියක් ආරම්භ කිරීමට රජය තීරණය කර තිබේ.
දේශීය උක් වගා ක්ෂේත්රය තුළ දැනට පවතින දුර්වලතා සහ අභියෝග ජය ගැනීම සඳහා, උක් නිෂ්පාදනයේ ගෝලීය ප්රමුඛයෙකු වන බ්රසීලයේ අතිනවීන තාක්ෂණික සහයෝගිතාව ලබා ගැනීමට මෙහිදී පියවර ගැනේ. ඒ අනුව, ශ්රී ලංකාවේ කර්මාන්ත සහ ව්යවසායකත්ව සංවර්ධන අමාත්යාංශය, උක් පර්යේෂණ ආයතනය හා ජාතික විද්යා පදනම, බ්රසීලයේ බ්රසීලියානු සහයෝගිතා ඒජන්සිය (ABC) සහ සාඕ කාලෝස් ෆෙඩරල් විශ්වවිද්යාලය (UFSCar) යන ඉහළ පෙළේ ආයතන ඒකාබද්ධව ‘ශ්රී ලංකාවේ උක් ව්යාපෘතිය’ ක්රියාත්මක කිරීමට සියල්ල සූදානම් කර ඇත.
මෙම ව්යාපෘතිය හරහා ශ්රී ලංකාවේ උක් අස්වැන්න සහ සීනි නිෂ්පාදනය සීඝ්රයෙන් වැඩි කිරීම, දේශීය ගොවීන් සහ නිලධාරීන්ගේ තාක්ෂණික ධාරිතාව ඉහළ නැංවීම, උක් වගාවේ අතුරු නිෂ්පාදන වඩාත් කාර්යක්ෂමව භාවිත කරමින් අගය එකතු කළ නිෂ්පාදන (Value-added products) ප්රවර්ධනය කිරීම ඇතුළු ක්ෂේත්ර රැසක සංවර්ධනයක් අපේක්ෂා කෙරේ. දෙරට අතර 2008 වසරේදී ඇති කරගත් තාක්ෂණික සහයෝගිතා ගිවිසුම් රාමුව යටතේ, මෙම යෝජිත ව්යාපෘතිය මාස 36ක (වසර 3ක) කාලයක් පුරා ක්රියාත්මක කිරීම සඳහා කර්මාන්ත සහ ව්යවසායකත්ව සංවර්ධන අමාත්යවරයා ඉදිරිපත් කළ කැබිනට් පත්රිකාවට අමාත්ය මණ්ඩලයේ නිල අනුමැතිය හිමිවී තිබේ.
