වත්මන් විදේශ විනිමය අර්බුදයට සහ ආර්ථික අස්ථාවරත්වයට මඟ පාදමින් ශ්රී ලංකා මධ්යම බැංකුව (CBSL) 2025 සහ 2026 වසරවලදී අඛණ්ඩව විශාල වශයෙන් මුදල් මුද්රණය කර ඇතැයි ‘නිදහස් නීතිඥයෝ’ (Free Lawyers) සංවිධානය ඊයේ (26) බරපතළ චෝදනාවක් එල්ල කළේය.
එම සංවිධානයේ ප්රධාන විධායක නිලධාරී කීර්ති තෙන්නකෝන් මහතා මාධ්ය වෙත අදහස් දක්වමින් කියා සිටියේ, මධ්යම බැංකුව විසින් 2025 වසර තුළදී රුපියල් බිලියන 1,653ක් (රු. බිලියන 1653ක්) මුද්රණය කර ඇති අතර, 2026 වත්මන් වසරේ ජනවාරි සිට මාර්තු දක්වා වූ මුල් මාස තුන තුළ පමණක් තවත් රුපියල් බිලියන 610.7ක මුදල් අච්චු ගසා ඇති බවයි. මේ හේතුවෙන් මේ වසරේ මාර්තු මාසය වන විට රටේ සමස්ත මුදල් සැපයුම (Total Money Supply) රුපියල් බිලියන 16,585.7ක් දක්වා අතිදැවැන්ත ලෙස ප්රසාරණය වී තිබේ.
මීට අමතරව මධ්යම බැංකු අධිපතිවරයා විසින් වාණිජ බැංකු ප්රධානීන් කැඳවා, ඇමරිකානු ඩොලරයට සාපේක්ෂව රුපියලේ අගය රුපියල් 329ත් 335ත් අතර සීමාවක කෘත්රිමව පවත්වාගෙන යන ලෙස උපදෙස් දී ඇතැයි ද තෙන්නකෝන් මහතා චෝදනා කළේය. මධ්යම බැංකුව සිය සේප්පුවල තිබූ රුපියල් යොදාගනිමින් වාණිජ බැංකුවලින් ඩොලර් මිලදී ගැනීමට කටයුතු කර ඇති බව ද හෙතෙම පැවසීය.
රටේ පවතින වත්මන් මූල්ය තත්ත්වය පිළිබඳව තවදුරටත් කරුණු දක්වමින් ඔහු කියා සිටියේ, පොලී අනුපාත 8.75% දක්වා ඉහළ ගොස් ඇති අතර, 2024 නොවැම්බර් වන විට රුපියල් බිලියන 28,240.22ක් ලෙස පැවති සමස්ත රාජ්ය ණය ප්රමාණය 2025 වසර අවසන් වන විට රුපියල් බිලියන 29,994.69ක් දක්වා ඉහළ ගොස් ඇති බවයි. මේ හේතුවෙන් මෙරට වාහන වෙළෙඳපොළ දැඩි අවුල් ජාලාවකට පත්ව ඇති අතර, රජයට නැවත වරක් ඉන්ධන මිල ඉහළ දැමීමට ද සිදුව ඇතැයි ඔහු පෙන්වා දුන්නේය. කෙටි මාධ්ය නිවේදන නිකුත් කරමින් මඟහැර සිටින්නේ නැතිව, මධ්යම බැංකුව වහාම මෙම බරපතළ චෝදනාවලට සෘජු පිළිතුරු සැපයිය යුතු බව ද නිදහස් නීතිඥයෝ සංවිධානය අවධාරණය කර සිටියි.
