මාතර නිල්වලා ගඟ ආශ්රිතව ඉදිකරන ලද ලවණ බාධකය හේතුවෙන් නිර්මාණය වූ කෘත්රිම ගංවතුර තත්ත්වය නිසා වසර ගණනාවක් තිස්සේ වගා හානි සිදු වූ සහ වගා කිරීමට නොහැකි වූ ගොවි ජනතාව වෙනුවෙන් රුපියල් මිලියන 1200ක දැවැන්ත වන්දි මුදල් ප්රදානය කිරීමේ මහා පුණ්ය මහෝත්සවය ජනාධිපති අනුර කුමාර දිසානායක මහතාගේ ප්රධානත්වයෙන් අද (27) පෙරවරුවේ මාලිම්බඩ ප්රාදේශීය සභා ශ්රවණාගාරයේදී ඉතා සාර්ථකව පවත්වා තිබේ.
පසුගිය 2019 වර්ෂයේදී නිසි සැලසුමකින් තොරව ඉදිකරන ලද මෙම ලවණ බාධකය (Salinity Barrier) හේතුවෙන් මාතර දිස්ත්රික්කයේ කඹුරුපිටිය, කැකණදුර, මාලිම්බඩ, විල්පිට, මඩිහ සහ තලල්ල ඇතුළු ප්රදේශ රැසක කුඹුරු ඉඩම් නිරන්තරයෙන් ගංවතුරෙන් යටවී වගා බිම් සම්පූර්ණයෙන්ම විනාශයට පත් විය. එවක පැවති කිසිදු රජයක් වසර ගණනාවක් තිස්සේ අසරණ වූ මෙම ගොවීන්ගේ ගැටලුවට සාධාරණ විසඳුමක් ලබා නොදුන් පසුබිමක, වත්මන් රජය විසින් 2026 ජාතික අයවැය මඟින් මෙම වන්දි මුදල් ගෙවීම සඳහා රුපියල් මිලියන 1200ක විශේෂ ප්රතිපාදන වෙන් කිරීමට පියවර ගත්තේය. ඒ අනුව 2019 යල කන්නයේ සිට 2022 යල කන්නය දක්වා වගා කිරීමට නොහැකි වූ අනුක්රමික කන්න 07ක් වෙනුවෙන්, තමන්ට සිදුවූ හානිය ගොවිජන සේවා මධ්යස්ථාන වෙත නිසි පරිදි වාර්තා කර තිබූ සියලුම ගොවීන් සඳහා මෙම වන්දි සහනය හිමි වේ.
මෙම වැඩපිළිවෙළ යටතේ දිස්ත්රික්කය පුරා වගා නොකළ කුඹුරු ඉඩම් අක්කර 12,800ක් වෙනුවෙන් වන්දි ප්රදානය කෙරෙන අතර, අද දින පැවැති උත්සවයේදී ජනාධිපතිවරයා අතින් සංකේතාත්මකව ගොවීන් 250 දෙනෙකු වෙත වන්දි චෙක්පත් පිරිනැමීම සිදු කෙරුණි. ඉතිරි සියලුම ගොවීන් සඳහා ඉදිරි දින 14 ඇතුළත වන්දි මුදල් ගෙවා අවසන් කිරීමට රජය සැලසුම් කර ඇත.
මෙහිදී අදහස් දැක්වූ ජනාධිපති අනුර කුමාර දිසානායක මහතා අවධාරණය කළේ, වත්මන් රජය ගොඩනඟා ඇති විනයගරුක සහ ශක්තිමත් ආර්ථික ප්රතිපත්තිය හේතුවෙන් පීඩාවට පත් ජනතාව වෙනුවෙන් ලංකා ඉතිහාසයේ වැඩිම වන්දි මුදලක් ලබාදීමට හැකිවූ බවයි. “යම් හානියක් සිදුවූ වහාම කෙටි කාලයක් තුළ වන්දි ගෙවිය යුතුයි” යන්න රජයේ ස්ථාවරය බව පැවසූ ජනාධිපතිවරයා, ජනතාවගේ ජීවන මට්ටම ඉහළ නැංවීම සඳහා කුඩා ව්යාපාරිකයන්ට ණය ලබාදීමට කර්මාන්ත අමාත්යාංශය යටතේ රුපියල් මිලියන 90,000ක් සහ ප්රජාශක්ති වැඩසටහන වෙනුවෙන් මිලියන 25ක් වෙන් කර ඇති බව ද ප්රකාශ කළේය.
