ස්වභාවික ආපදා සහ ව්යසන කළමනාකරණ කටයුතු නිසි ලෙස පාලනය කිරීම සඳහා දැනට පවතින නීති රීති අකුරටම ක්රියාත්මක කරන ලෙස බලධාරීන් වෙත නියෝගයක් නිකුත් කරන්නැයි ඉල්ලා ගොනු කළ රිට් පෙත්සමක් විභාගයට ගැනීමට අභියාචනාධිකරණය අද (27) නියෝග කළේය. පරිසර යුක්ති කේන්ද්රය විසින් ඉදිරිපත් කරන ලද මෙම පෙත්සම සලකා බැලීමෙන් අනතුරුව, අභියාචනාධිකරණ විනිසුරු ෆ්රෑන්ක් ගුණවර්ධන මහතා විසින් මෙම අවසරය ලබා දෙන ලදී.
ඒ අනුව, පෙත්සමේ වගඋත්තරකරුවන් ලෙස නම් කර සිටින කෘෂිකර්ම අමාත්යවරයා, පරිසර අමාත්යවරයා, මධ්යම පරිසර අධිකාරිය, පොලිස්පතිවරයා, ආරක්ෂක ලේකම්වරයා සහ වාරිමාර්ග අධ්යක්ෂ ජෙනරාල්වරයා ඇතුළු පිරිස වෙත අධිකරණයේ කරුණු දක්වන ලෙස දන්වා නොතීසි නිකුත් කිරීමට ද විනිසුරුවරයා පියවර ගත්තේය.
පෙත්සම්කාර සංවිධානය වෙනුවෙන් පෙනී සිටි නීතිඥ ආචාර්ය රවින්ද්රනාත් දාබරේ මහතා අධිකරණය හමුවේ කරුණු දක්වමින් කියා සිටියේ, ස්වභාවික ආපදා පාලනය කිරීම උදෙසා ශ්රී ලංකාව තුළ අණපනත් 20කට ආසන්න සංඛ්යාවක් පවතින බවයි. එහෙත් එම නීති බලධාරීන් විසින් නිසි පරිදි ක්රියාත්මක නොකිරීම හේතුවෙන් රට තුළ බරපතළ ව්යසනකාරී තත්ත්වයන් උද්ගත වන අතර, ඒවා පාලනය කරගැනීමට පවා නොහැකි වී ඇති බව ඔහු පෙන්වා දුන්නේය. ආපදා කළමනාකරණ නීති නිසි ලෙස ක්රියාත්මක නොවීම නිසා සිදුවන බරපතළ හානි පිළිබඳව ජාතික විගණන කාර්යාලය නිකුත් කළ වාර්තාවක ද පැහැදිලිව පෙන්වා දී ඇති බව නීතිඥවරයා මෙහිදී සිහිපත් කළේය.
ඉදිරිපත් වූ සියලු කරුණු සලකා බැලූ අභියාචනාධිකරණය, ගංවතුර ඇතුළු ස්වභාවික ව්යසන අවම කිරීම සඳහා නිශ්චිත වැඩපිළිවෙළක් සකස් කිරීමට බලධාරීන්ට නියෝගයක් නිකුත් කරන ලෙස ඉල්ලා ඇති මෙම පෙත්සම, එළඹෙන ජූලි මස 07 වැනිදා නැවත කැඳවීමට නියම කළේය.
