පවතින ආර්ථික අර්බුදය කළමනාකරණය කිරීම සඳහා වත්මන් ආණ්ඩුව සතු දැනුම සහ අවබෝධය පිළිබඳව දැඩි සැකයක් පවතින බව ශ්රී ලංකා පොදුජන පෙරමුණේ හිටපු පාර්ලිමේන්තු මන්ත්රී සංජීව එදිරිමාන්න මහතා පවසයි. පසුගිය කාලයේ ඕනෑම අර්බුදයකට මුහුණ දිය හැකි ‘මාලිමාවට අනන්ය වූ විසඳුම් ආකෘතියක්’ ඇතැයි පැවසුවද, ප්රායෝගිකව එවැනි කිසිදු දක්ෂතාවක් රජය තුළින් දැකගත නොහැකි බව හෙතෙම සඳහන් කරයි.
පොලී අනුපාතිකය සියයට එකකින් ඉහළ දැමීම ආර්ථිකයේ පවතින අර්බුදකාරී තත්ත්වයේ සංකේතයකි. උද්ධමනය ඉහළ යෑම, රුපියල මත පවතින දැඩි පීඩනය සහ ආනයනික භාණ්ඩවල පවතින ඉහළ වියදම හමුවේ ආණ්ඩුව මෙම තීරණයට එළඹියද, එහි බලපෑම සම්බන්ධයෙන් ඔවුන්ට නිසි අවබෝධයක් තිබේද යන්න ගැටලු සහගතය.
මෙම පොලී අනුපාතික ඉහළ යෑම නිසා පොදු මහජනතාවගේ සහ කුඩා හා මධ්ය පරිමාණ ව්යවසායකයින්ගේ ණය පිරිවැය තවදුරටත් ඉහළ යනු ඇත. නිෂ්පාදන වියදම ඉහළ යෑම, ආයෝජන පහළ යෑම සහ මුදල් සංසරණය අඩුවීම වැනි කරුණු හරහා රට ආර්ථික අර්බුදයක ගමන් කරන බව ඔහු පෙන්වා දෙයි.
බලයට පත්වීමට පෙර ආණ්ඩුව මහජනතාවට පොරොන්දු වූයේ යහපත් ආර්ථික වටපිටාවක් සහ දියුණුවක් ඇති කරන බවයි. කෙසේ වෙතත්, වර්තමානයේ පවතින ගෝලීය බලපෑම කළමනාකරණය කිරීමට ඔවුන් සතු සැලසුම් හෝ අනන්ය විසඳුම් ආකෘතීන් ක්රියාත්මක නොවීම පිළිබඳව ජනතාව ප්රශ්න කරමින් සිටී.
තම ආර්ථික කළමනාකරණ හැකියාව පිළිබඳව ආඩම්බරයෙන් කතා කළ රජය, මේ වන විට මහ පොළොවේ පවතින ආර්ථික ගැටලු විසඳීමට අපොහොසත් වී ඇති බවත්, මාලිමාවට අනන්ය වූ එම විසඳුම් ආකෘතිය ක්රියාත්මක කරන්නේ කවදාදැයි ඔවුන් පිළිතුරු දිය යුතු බවත් හිටපු මන්ත්රීවරයා වැඩිදුරටත් අවධාරණය කළේය.
