ගලේවෙල, තෙන්නකෝන්පුර ශෛල බිම්බාරාමයේදී අතිශය දුෂ්කර සහ වටිනා උත්සාහයක් දරමින් පිහිටි කළු ගලකින් අඩි 21ක උස බුද්ධ ප්රතිමාවක් නෙළීමේ කටයුතු මේ දිනවල සිදුවෙමින් පවතිනවා. මෙම සුවිශේෂී පින්කම ආරම්භ කර ඇත්තේ 80 වියැති විහාරාධිපති වැලිකැටියේ නන්දරතන හිමියන්ගේ අදහසකට අනුවයි.
කෘෂිකර්මාන්තයෙන් සහ කුලී වැඩවලින් ජීවත්වන අතිශය දුෂ්කර ගම්මානයක ජනතාව, නන්දරතන හිමියන්ගේ අදහස ඉටු කිරීම සඳහා නොමඳ දායකත්වයක් ලබා දෙනවා. පන්සියගම ප්රදේශයේ පදිංචි දක්ෂ ගල්වඩු ශිල්පියෙකු සහ 22 හැවිරිදි තරුණයෙකු මෙම අභියෝගාත්මක කාර්යය සඳහා දැඩි වෙහෙසක් දරමින් සිටින අතර, මේ වන විට පිළිම නෙළීමේ කටයුතුවලින් 40%ක් පමණ අවසන් කර තිබෙනවා.
තම ජීවිතයේ අවසන් කාලයේ පසුවන වැලිකැටියේ නන්දරතන හිමියන් පවසන්නේ තමන් අපවත් වීමට පෙර මෙම බුද්ධ ප්රතිමාව නෙළා අවසන් කොට, ඊට මලක් පූජා කිරීම තමන්ගේ එකම බලාපොරොත්තුව සහ අරමුණ බවයි. දශක ගණනාවක් තිස්සේ පැවැති මෙම අධිෂ්ඨානය මල්ඵල ගැන්වීම උන්වහන්සේගේ පරම අභිප්රාය වී තිබෙනවා. ග්රාමීය ජනතාවගේ දහඩිය සහ සැදැහැවතුන්ගේ ශ්රමය එක්ව සිදුවන මෙම කර්තව්යය, මනුෂ්ය අධිෂ්ඨානයේ සහ ශ්රද්ධාවේ කදිම නිදසුනක් ලෙස හැඳින්විය හැකියි.
