පාස්කු ප්රහාරයේ සිට මැදපෙරදිග යුද්ධය දක්වා ඛේදවාචක පහකට මුහුණ දුන් ශ්රී ලංකාව මේ වන විට සයවන ඛේදවාචකය ලෙස ජනතා විමුක්ති පෙරමුණේ (ජවිපේ) බොරුකාර දේශපාලනයට හසුව ඇති බව විපක්ෂ නායක සජිත් ප්රේමදාස මහතා පවසයි. මාතර අකුරැස්ස ප්රදේශයේ පැවැති ජන හමුවක් අමතමින් ඔහු මෙම අදහස් පළ කළේය.
සමගි ජන බලවේගයේ වැඩපිළිවෙළ වන්නේ සමාජ ප්රජාතන්ත්රවාදී ක්රමවේදය තුළ සංවර්ධනය ප්රවර්ධනය කර රට ගොඩනැගීම බවත්, නමුත් රට බංකොලොත් කළ අය රටේ සංවර්ධනයට බාධා පමුණුවන බවත් ඔහු පැවසීය. රට බංකොලොත් කළ පුද්ගලයින්ට එරෙහිව සමගි ජන බලවේගය ශ්රේෂ්ඨාධිකරණය හමුවේ ගොනු කළ නඩුවකින් ඔවුන් ලක්ෂ 220ක ජනතාවගේ මූලික අයිතිවාසිකම් උල්ලංඝනය කළ බවට තීන්දු වී ඇති බව ද විපක්ෂ නායකවරයා සිහිපත් කළේය.
ජවිපේ පාර්ශවයෙන් අසත්ය පොරොන්දු ලබා දෙන බවට චෝදනා කළ විපක්ෂ නායකවරයා, දේශපාලන වේදිකාවේදී ඩොලර් මිලියන 23ක් මෙරටට ගෙන එන බවට ප්රකාශ කළ ද එය අසත්යයක් බවත්, ජාත්යන්තර මූල්ය අරමුදල (IMF) මෙරටට ලැබෙන ආධාරවලට විරුද්ධ නොවන බවත් අවධාරණය කළේය. එම මුදල් ඇත්නම් රට රවටන්නේ නැතිව දිට්වා සුළි කුණාටුවෙන් විපතට පත් ජනතාවට සහන ලබා දීමට පියවර ගන්නා ලෙස ඔහු අභියෝග කළේය.
රටේ ආර්ථික සංවර්ධනය සඳහා අපනයන කේන්ද්රීය ආර්ථිකය ශක්තිමත් කිරීම, දේශීය කර්මාන්ත හා කෘෂිකර්මාන්තය නැංවීම සහ තරුණ පරපුරට නවීන තාක්ෂණික දැනුම ලබා දී සුහුරු තාරුණ්යයක් නිර්මාණය කිරීම අත්යවශ්ය බව ද ඔහු සඳහන් කළේය. නිදහස් අධ්යාපනය සහ සෞඛ්ය ශක්තිමත් කරමින් මානුෂීය ධනවාදය හා සමාජ ප්රජාතන්ත්රවාදය එකට එකතු කළ වැඩපිළිවෙළක් ක්රියාත්මක කරන බව ද විපක්ෂ නායකවරයා මෙහිදී වැඩිදුරටත් අවධාරණය කළේය.
පවතින රජය බලයට පැමිණියේ විදුලි බිල අඩු කරන බවට සහ ඉන්ධන මිල අඩු කරන බවට පොරොන්දු ලබා දෙමින් වුවත්, මේ වන විට බදු පිට බදු ගසා රටේ ජනතාවට වැඩිම මිලකට ඉන්ධන ලබා දෙන තත්ත්වයට පත් කර ඇති බව ඔහු චෝදනා කළේය. ජනතාව තවදුරටත් නොරවටන ලෙසත්, මෙම ‘ටොම්පච’ දේශපාලනය නවත්වන ලෙසත් ඔහු රජයෙන් ඉල්ලා සිටියේය.
