බ්රසීල ජනාධිපති ලුයිස් ඉනාසියෝ ලූලා ද සිල්වාගේ රජය විසින් නීතිවිරෝධී රන් කැණීම් මැඩලීම සඳහා දැඩි පියවර ගනිමින් සිටියද, ඇමේසන් වැසි වනාන්තරයෙන් තවමත් බිලියන ගණනක වටිනාකමකින් යුත් රන් නීතිවිරෝධී ලෙස නිස්සාරණය කෙරෙන බව ග්රීන්පීස් (Greenpeace) සංවිධානය නිකුත් කළ නවතම අධ්යයනයකින් අනාවරණය වේ.
පසුගිය වසරේදී බ්රසීල ෆෙඩරල් පොලිසිය විසින් නීතිවිරෝධී ලෙස කැණීම් කරන ලද වාර්තාගත රන් ප්රමාණයක් (කිලෝ 447ක්) අත්අඩංගුවට ගත් නමුත්, රන් මිල ඉහළ යාම හේතුවෙන් නීතිවිරෝධී පතල්කරුවන් නව උපක්රම භාවිතා කරන බව ග්රීන්පීස් පෙන්වා දෙයි. ඔවුන් “භූත බලපත්ර” (ghost permits) ලෙස හඳුන්වනු ලබන ක්රමයක් භාවිතා කරමින්, රන් කැණීම් සිදු නොවන ස්ථාන සඳහා නිකුත් කර ඇති බලපත්ර යොදාගෙන නීතිවිරෝධී ලෙස ලබාගත් රන්වල මූලාරම්භය ව්යාජ ලෙස සකස් කර අලෙවි කරනු ලබයි.
කෙසේ වෙතත්, එම “භූත බලපත්ර” භාවිතා කරමින් 2018 සිට 2026 මාර්තු දක්වා කාලය තුළ අමෙරිකානු ඩොලර් බිලියන 3.88ක් වටිනා මෙට්රික් ටොන් 26.8ක රන් තොගයක් අලෙවි කර ඇත.
මෙම ක්රියාවලිය හේතුවෙන් ඇමේසන් වනාන්තරයේ ජලය දූෂණය වීම සහ කයාපෝ (Kayapo) වැනි දේශීය ජන කොටස්වලට අයත් භූමි විනාශ වීම දැඩි අර්බුදයකට ලක්ව ඇති බව වාර්තා වේ. දේශීය නායක මෙගාරොන් ට්සුකරමේ මහතා පවසන්නේ, මෙම ක්රියාවලිය නිසා ගංගා දූෂණය වී එම ජනතාවට විෂ සහිත මසුන් ආහාරයට ගැනීමට සිදුව ඇති බවයි.
බ්රසීල පතල් නියෝජිතායතනය (ANM) ප්රකාශ කරන්නේ, තමන් මෙම අක්රමිකතා සම්බන්ධයෙන් පරීක්ෂණ පවත්වන බවත්, ඇමේසන් කලාපයේ විශාලත්වය සහ නිකුත් කර ඇති බලපත්ර දහස් ගණනක් හේතුවෙන් අධීක්ෂණය කිරීමේ දැඩි අභියෝග පවතින බවත්ය.
