අද (29) දිනයේදී කොළඹ කොටස් වෙළෙඳපොළ කැපීපෙනෙන වර්ධනයක් වාර්තා කරමින් සාර්ථක ලෙස ගනුදෙනු අවසන් කළේය. දිනය අවසානයේ සියලු කොටස් මිල දර්ශකය ඒකක 111.57කින් ඉහළ ගොස් ඒකක 22,310.80ක් ලෙස සටහන් වූ අතර, S&P SL20 දර්ශකය ඒකක 27.81කින් ඉහළ ගොස් ඒකක 6,159.15ක් ලෙස සටහන් විය.
අද දින ගනුදෙනු පිරිවැටුම රුපියල් බිලියන 7.37ක් ලෙස වාර්තා වීම විශේෂත්වයකි. මෙම ඉහළ පිරිවැටුමට ප්රධානතම හේතුව වූයේ HNB ෆිනෑන්ස් සමාගමේ සිදුවූ රුපියල් බිලියන 3.52ක ගිවිසුම්ගත ගනුදෙනුවයි. එහිදී ප්රයිම් ලෑන්ඩ්ස් (පුද්ගලික) සමාගම විසින් තමන් සතු කොටස් මිලියන 400ක් එක් කොටසක් රුපියල් 8.80 බැගින් අලෙවි කර තිබිණි. තවද, සොෆ්ට්ලොජික් ඉන්ෂුවරන්ස් සමාගමේ වාර්තා වූ රුපියල් බිලියනය ඉක්මවූ ගිවිසුම්ගත ගනුදෙනුව ද දෛනික පිරිවැටුම ඉහළ නැංවීමට විශාල දායකත්වයක් ලබා දුන්නේය.
කොමර්ෂල් බැංකුව, ඩයලොග් ආසියාටා, මෙල්ස්ටාකෝප්, ඇක්සෙස් ඉංජිනියරින්ග් සහ හේමාස් හෝල්ඩිංග්ස් යන සමාගම්වල කොටස් මිල ගණන් ඉහළ යාම සියලු කොටස් මිල දර්ශකයේ මෙම වර්ධනයට මූලිකව බලපෑවේය.
