බේරුවල ධීවර වරායෙන් මුහුදු ගොස් අතුරුදන්ව තිබූ ‘මිනු බබා-1’ බහුදින ධීවර යාත්රාව දින 10කට පසු අද (29) හික්කඩුව ධීවර වරායට ළඟා විය. ධීවරයන් 6 දෙනෙකු ගමන් ගත් මෙම යාත්රාව පසුගිය අප්රේල් 26 වැනි දින මුහුදු ගොස් තිබූ අතර, ඇති වූ කාර්මික දෝෂයක් හේතුවෙන් ශ්රී ලංකා මුහුදු තීරයේ සිට කිලෝමීටර් 300ක් පමණ ඈතට යාත්රාව ගසාගෙන ගොස් තිබිණි.
යාත්රාවේ එන්ජිම ක්රියාවිරහිත වීමත් සමඟ ගොඩබිම සමඟ පැවති සන්නිවේදන සබඳතා ද බිඳ වැටී තිබූ අතර, එහි සිටි ධීවරයන්ට ආහාර සහ පානීය ජලය නොමැතිව දැඩි අසීරුතාවකට මුහුණ දීමට සිදුවිය. තත්ත්වය බරපතල වූ අවස්ථාවලදී බැටරිවල තිබූ ජලය පවා පානය කිරීමට සිදු වූ බව ධීවරයෝ පැවසූහ. පසුව වෙනත් ධීවර යාත්රාවක් මගින් ඔවුන් වෙත අවශ්ය ඉන්ධන, ආහාර සහ ජලය සපයා දීමෙන් අනතුරුව, එම යාත්රාව ආධාරයෙන් හික්කඩුව වරාය වෙත පැමිණීමට ඔවුන් සමත් විය.
