ශ්රී ලංකාවේ ඖෂධ අපනයන ක්ෂේත්රයේ පවතින බාධාවන් ඉවත් කර එහි උපරිම විභවතාවන් සාක්ෂාත් කර ගැනීමේ අරමුණින්, අපනයන සංවර්ධන මණ්ඩලය (EDB), ජාතික ඖෂධ නියාමන අධිකාරිය (NMRA) සහ මෙරට ප්රමුඛ පෙළේ ඖෂධ නිෂ්පාදකයින් අතර විශේෂ සාකච්ඡාවක් පැවැත්විණි.
අපනයන සංවර්ධන මණ්ඩලයේ සභාපති සහ ප්රධාන විධායක නිලධාරී මංගල විජේසිංහ මහතා සඳහන් කළේ, ඖෂධ නිෂ්පාදන ක්ෂේත්රය සතුව ඉහළ ධාරිතාවක් පැවතිය ද අපනයන ආදායම තවමත් අපේක්ෂිත මට්ටමට ළඟා වී නොමැති බවයි. 2030 වසර වන විට ශ්රී ලංකාව අපේක්ෂා කරන ඇමරිකානු ඩොලර් බිලියන 36ක සමස්ත අපනයන ඉලක්කය සපුරා ගැනීම සඳහා ඖෂධ ක්ෂේත්රය ප්රධාන මෙහෙවරක් ඉටු කරනු ඇති බව ද ඔහු වැඩිදුරටත් පැවසීය.
ජාතික ඖෂධ නියාමන අධිකාරියේ සභාපති වෛද්ය ආනන්ද විජේවික්රම මහතා අවධාරණය කළේ, මෙරට සෞඛ්ය ප්රමිතීන් ආරක්ෂා කරන අතරම ඖෂධ නිෂ්පාදකයින්ගේ ජාත්යන්තර අපනයන අරමුණු සාක්ෂාත් කර ගැනීමට තම අධිකාරිය කැපවී සිටින බවයි. ජාත්යන්තර වෙළෙඳපොළ තුළ ශ්රී ලාංකීය ඖෂධ සඳහා වැඩි විශ්වාසයක් දිනා ගැනීම වෙනුවෙන් නියාමන ක්රියාවලීන් ජාත්යන්තර ප්රමිතීන්ට අනුකූලව සකස් කරන බව ද ඔහු ප්රකාශ කළේය.
මෙම සාකච්ඡාවේදී ඖෂධ නිෂ්පාදකයින් මුහුණ දෙන ප්රායෝගික ගැටලු සම්බන්ධයෙන් ද විශේෂ අවධානයක් යොමු විය. විශේෂයෙන්ම ඖෂධ නිෂ්පාදන ලියාපදිංචි කිරීමේ ක්රියාවලියේ පවතින ප්රමාදයන්, අනෙකුත් නියාමන කටයුතු සඳහා ගතවන කාලය සහ විදේශීය වෙළෙඳපොළවල නිරන්තරයෙන් වෙනස් වන අනුකූලතා රාමුවලට අනුගත වීමේදී පැන නගින දුෂ්කරතා පිළිබඳව නිෂ්පාදකයින් විසින් කරුණු පැහැදිලි කරන ලදී.
නිෂ්පාදකයින් මුහුණ දෙන මෙම අභියෝග සඳහා විසඳුම් ලබා දීමට අපනයන සංවර්ධන මණ්ඩලය සහ ජාතික ඖෂධ නියාමන අධිකාරිය දක්වන උනන්දුව සම්බන්ධයෙන් නිෂ්පාදකයින් මෙහිදී සිය ප්රසාදය පළ කළහ. ශ්රී ලංකාවේ ඖෂධ නිෂ්පාදන ලෝක වෙළෙඳපොළ ජයග්රහණය කරවීම සඳහා මෙම ආයතන සහ පෞද්ගලික අංශය අතර පවතින අඛණ්ඩ සහයෝගීතාව අත්යවශ්ය සාධකයක් බව අවධාරණය කෙරිණි.
