අභියාචනාධිකරණ සහ ශ්රේෂ්ඨාධිකරණ විනිසුරුවරුන්ගේ විශ්රාම යාමේ වයස් සීමාවන් ඉහළ නැංවීම සඳහා රජය විසින් යෝජනා කර ඇති ආණ්ඩුක්රම ව්යවස්ථා සංශෝධන ක්රියාවලිය වහාම අත්හිටුවන ලෙස ශ්රී ලංකා නීතිඥ සංගමය (BASL) ජනාධිපතිවරයා වෙත විවෘත ලිපියක් යොමු කරමින් බලකර සිටී. නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා යන මහත්වරුන්ගේ අත්සනින් නිකුත් කළ මෙම නිල නිවේදනය මගින් පෙන්වා දෙන්නේ, පවතින තත්ත්වය හමුවේ මෙවැනි පියවරක් ගැනීම අධිකරණයේ ස්වාධීනත්වයට සෘජු ලෙසම බලපෑම් කිරීමට දරන උත්සාහයක් ලෙස මහජනතාව විසින් අර්ථකථනය කිරීමට ඉඩ ඇති බවයි.
1978 ආණ්ඩුක්රම ව්යවස්ථාව ප්රකාශයට පත් කළ දා පටන් අඛණ්ඩව ශ්රේෂ්ඨාධිකරණ විනිසුරුවරුන් සඳහා වයස අවුරුදු 65ක් සහ අභියාචනාධිකරණ විනිසුරුවරුන් සඳහා වයස අවුරුදු 63ක් ලෙස පැවති ස්ථාවර වයස් සීමාවන් වෙනස් කිරීමට යාම අධිකරණ ව්යුහයේ ගෞරවයට හානි පමුණුවන්නක් බව නීතිඥ සංගමය වැඩිදුරටත් අවධාරණය කරයි. විශේෂයෙන්ම, 20 වැනි ව්යවස්ථා සංශෝධනය හරහා දැනටමත් අධිකරණ විනිසුරුවරුන්ගේ සංඛ්යාව සැලකිය යුතු ලෙස ඉහළ දමා ඇති පසුබිමක, මෙවැනි අමතර සංශෝධනයක් සිදුකිරීම මගින් අධිකරණ ක්රමවේදයන්හි ස්ථාවරත්වය සහ විශ්වසනීයත්වය බිඳ වැටීමේ අවදානමක් පවතින බව ඔවුහු අනතුරු අඟවති.
දිගුකාලීන සැලසුම් සහ පුළුල් සමාජ සංවාදයකින් තොරව හදිසියේ ගනු ලබන මෙවැනි තීරණ, අනාගත රජයන් සඳහා අධිකරණමය කටයුතු සම්බන්ධයෙන් අයහපත් සහ භයානක පූර්වාදර්ශයන් සකස් කරනු ඇති බවට නීතිඥ සංගමය අනතුරු අඟවයි. අධිකරණ ක්ෂේත්රයේ ස්වාධීනත්වය සහ ගෞරවය සුරක්ෂිත කිරීම උදෙසා යෝජිත මෙම සංශෝධන ක්රියාවලියෙන් ඉවත් වන ලෙස ඔවුන් ජනාධිපතිවරයාගෙන් ඉල්ලා සිටින අතර, මෙම තීරණය ඉදිරි දේශපාලන සහ නෛතික වටපිටාව කෙරෙහි බලපාන ආකාරය පිළිබඳව මේ වන විටත් රට තුළ බරපතල කතිකාවතක් නිර්මාණය වී තිබේ.
