ඉන්දියාව සහ ඕමානය අතර ද්විපාර්ශ්වික ආර්ථික සබඳතා නව මාවතකට යොමු කරමින්, දෙරට අතර ඇති කරගත් ‘විස්තීර්ණ ආර්ථික හවුල්කාරිත්ව ගිවිසුම’ (CEPA) ඊයේ සිට නිල වශයෙන් ක්රියාත්මක විය. මෙම ඓතිහාසික ගිවිසුම හරහා ඉන්දීය අපනයනකරුවන්ට ඕමාන වෙළඳපොළ තුළ විශාල බදු සහනයක් හිමිවන අතර, ඕමානයේ තීරුබදු කේතවලින් 98.08%කට අධික ප්රමාණයකට තීරුබදු රහිතව ප්රවේශ වීමේ අවස්ථාව හිමිවී තිබේ. මෙය සමස්ත ඉන්දීය අපනයන වටිනාකමෙන් 99%කටත් වඩා වැඩි ප්රමාණයක් ආවරණය වන පරිදි ක්රියාත්මක වේ.
මෙම ගිවිසුම හරහා ඉංජිනේරු භාණ්ඩ, ඖෂධ, රෙදිපිළි, රසායනික ද්රව්ය, ඉලෙක්ට්රොනික උපකරණ, ප්ලාස්ටික් සහ මැණික් හා ස්වර්ණාභරණ වැනි ප්රධාන ක්ෂේත්ර රැසක අපනයන කටයුතු සැලකිය යුතු ලෙස ඉහළ යනු ඇතැයි ආර්ථික විශේෂඥයෝ අපේක්ෂා කරති. එපමණක් නොව, මී පැණි, කජු, මස් නිෂ්පාදන, බේකරි නිෂ්පාදන, චොකලට්, කිරි නිෂ්පාදන සහ ශීත කළ මාළු වැනි භාණ්ඩ සඳහා ද පළමු දිනයේ සිටම ඕමාන වෙළඳපොළට තීරුබදු රහිතව ඇතුළු වීමේ අවස්ථාව උදාවී ඇත. භාණ්ඩ වෙළඳාමට අමතරව, ගිණුම්කරණය, බදුකරණය, ගෘහ නිර්මාණ ශිල්පය සහ සෞඛ්ය සේවා වැනි වෘත්තීය සේවා ක්ෂේත්ර සඳහා ද මෙමඟින් ලිහිල් ප්රතිපත්තීන් හඳුන්වා දී තිබීම විශේෂත්වයකි.
දෙරට අතර ආර්ථික සමතුලිතතාවය පවත්වා ගනිමින්, ඉන්දියාව විසින් ද ඕමාන නිෂ්පාදන වන රටඉඳි, පෙට්රොකෙමිකල් සහ මාබල් වැනි ද්රව්ය සඳහා විශේෂ බදු සහන ලබා දීමට පියවර ගෙන ඇත. දෙරටේම සැපයුම් දාමයන් ශක්තිමත් කරමින් වෙළඳාම, ආයෝජන සහ සේවා සහයෝගීතාව ඉහළ නැංවීමට මහෝපකාරී වන මෙම ගිවිසුම, ඉදිරි වසර කිහිපය තුළ ඉන්දියාව සහ ඕමානය අතර ආර්ථික සබඳතා තවදුරටත් නව මානයකට රැගෙන යනු ඇත.
