සීනි අධික බීම වර්ග නිසා වැළඳෙන බෝ නොවන රෝග (NCDs) පාලනය කිරීමේ අරමුණින් ශ්රී ලංකාව තුළ ක්රියාත්මක ‘ට්රැෆික් ලයිට්’ ලේබල් ක්රමවේදයේ පවතින නියාමන හිඩැස් සහ ගැටලු පිළිබඳව නවතම පර්යේෂණ වාර්තාවක් මගින් අනාවරණය වී තිබේ.
මෙම පර්යේෂණයට අනුව, බීම නිෂ්පාදන සමාගම් විසින් පාරිභෝගිකයා නොමඟ යවන සුළු ක්රමවේදයන් අනුගමනය කිරීම සහ පවතින රෙගුලාසිවල ඇති අඩුපාඩු හේතුවෙන් මෙම වැඩසටහනේ අපේක්ෂිත සෞඛ්ය ප්රතිඵල අඩපණ වී ඇති බව අනතුරු ඇඟවේ.
ප්රධාන ගැටලුවක් ලෙස හඳුනාගෙන ඇත්තේ නියාමන ක්රමවේදවලට සම්පූර්ණයෙන්ම අනුකූල වීමට උත්සාහ කරනවාට වඩා, ඇතැම් සමාගම් තම නිෂ්පාදනවල සීනි මට්ටම මඳක් අඩු කර ලේබලයේ වර්ණය වෙනස් කර ගැනීම පමණක් සිදු කර තිබීමයි. එමෙන්ම, ‘ට්රැෆික් ලයිට්’ ලේබලය මගින් යම් සෞඛ්ය සම්පන්න බවක් හැඟවූවද, එම බීමවල අඩංගු කෘත්රිම රසකාරක සහ වෙනත් අහිතකර සංඝටක පිළිබඳව පාරිභෝගිකයාට නිසි අවබෝධයක් නොලැබීම තවත් ගැටලුවකි. පවතින නීති රෙගුලාසිවල ඇති ලිහිල් භාවය නිසා නිෂ්පාදකයින්ට ඉතා පහසුවෙන් නියාමනයන් මගහැර යාමට ඉඩකඩ ලැබී ඇති අතර, සෞඛ්ය අංශවල උපදෙස්වලට වඩා සමාගම්වල දැවැන්ත ප්රචාරණ ව්යාපාර හරහා ජනතාව සීනි සහිත බීම පරිභෝජනයට නිරන්තරයෙන් පෙළඹවීම සිදු වේ.
මෙම සොයාගැනීම්වලට අනුව, වත්මන් ලේබල් ක්රමය තවදුරටත් ශක්තිමත් කිරීමත්, වඩාත් දැඩි නියාමන රාමුවක් සකස් කිරීමත් අත්යවශ්ය බව පර්යේෂකයින් පෙන්වා දෙයි. බෝ නොවන රෝග පාලනය කිරීම සඳහා සැබෑ සෞඛ්ය ප්රතිඵල ලබා ගැනීමට නම්, ලේබල්වලට පමණක් සීමා නොවී සීනි බදු ප්රතිපත්ති සහ පාරිභෝගික දැනුවත් කිරීමේ වැඩසටහන් වඩාත් විධිමත් කළ යුතු බව ඔවුහු වැඩිදුරටත් සඳහන් කරති.
