දිවයිනේ දැඩි ලෙස පවතින අලි – මිනිස් ගැටුම පාලනය කිරීම සඳහා අලි කොරිඩෝ හෙවත් අලිමංකඩ තුනක් හම්බන්තොට හා මොනරාගල දිස්ත්රික්කවල විවෘත කිරීමට කැබිනට් අනුමැතිය හිමිව ඇති බව පරිසර අමාත්ය දම්මික පටබැඳි මහතා ප්රකාශ කළේය. රජයේ ප්රවෘත්ති දෙපාර්තමේන්තුවේ ඊයේ (08) පැවැති මාධ්ය සාකච්ඡාවකට එක්වෙමින් අමාත්යවරයා සඳහන් කළේ, ජගත් පරිසර දිනය නිමිත්තෙන් හම්බන්තොට දිස්ත්රික්කයේ වැටහිරකන්ද, කොහොලංකල සහ මොනරාගල දිස්ත්රික්කයේ හඳපානාගල යන අලිමංකඩ තුන මෙලෙස විවෘත කිරීමට තීරණය කර ඇති බවයි.
පසුගිය රජයන් විසින් ගන්නා ලද වැරදි තීන්දු තීරණ මෙන්ම අලින් ගමන් කරන සාම්ප්රදායික කලාපවල ජනතාව පදිංචි කිරීම මෙම ගැටලුව උග්ර වීමට හේතු වී තිබේ. මීට අමතරව, වනජීවී දෙපාර්තමේන්තුවේ පවතින මානව සම්පත් හිඟය පියවීම සඳහා වනසත්ව අඩවි ආරක්ෂකයන් 141ක්, වන සත්ව නියාමකයන් 381ක් සහ අලි වැට සහායකයන් 3,500ක් බඳවා ගෙන ඇති අතර, සිවිල් ආරක්ෂක දෙපාර්තමේන්තුවේ නිලධාරීන් ද සමඟ මුළු පිරිස 5,000ක් වන පරිදි වනජීවී දෙපාර්තමේන්තුවට අනුයුක්ත කර ඇත. එමෙන්ම වනජීවී කටයුතු සඳහා අවශ්ය ට්රැක්ටර්, අත්ට්රැක්ටර් සහ යතුරුපැදි මිලදී ගැනීමේ කටයුතු ද මේ දිනවල සිදුවෙමින් පවතී.
අලි ඇතුන් සංරක්ෂණය සහ ඉදිරි විද්යාත්මක පියවර පිළිබඳව අදහස් දක්වමින් පරිසර අමාත්යවරයා මෙසේ අවධාරණය කළේය.
“අපේ රටේ සංස්කෘතිය හා බැඳුණු හීලෑ අලි ඇතුන්ගේ ගැටලුව විසඳීම සඳහාත් අප රජයක් ලෙස මැදිහත් වී තිබෙනවා. එමෙන්ම අලි ඇතුන් සම්බන්ධ පර්යේෂණ, හැදෑරීම් සහ උන්ගේ සුබසාධනය වෙනුවෙන් පින්නවල අලි අනාථාගාරය ඉදිරියේදී විධිමත් පර්යේෂණ මධ්යස්ථානයක් සහ අලි ඇතුන් අභිජනන මධ්යස්ථානයක් බවට පත් කිරීමට අප තීරණය කළා. අලි – මිනිස් ගැටුම පාලනය කිරීම සඳහා 2020 වසරේදී විද්වතුන් විසින් සකස් කරන ලද වැඩපිළිවෙළ වත්මන් තත්ත්වයට ගැළපෙන පරිදි යාවත්කාලීන කරමින්, ඉතා කෙටි කාලයක් තුළ මෙම ගැටලුවට සාර්ථක විසඳුම් සෙවීම අපේ මූලික අරමුණයි.”
