දකුණු ආසියාවේ අනාගත ආර්ථික සාර්ථකත්වය ආණ්ඩු බලය හිමි රජයන් විසින් පමණක් නොව, කලාපය පුරා ආර්ථික ක්රියාකාරකම් මෙහෙයවනු ලබන ව්යාපාරිකයන්, ව්යවසායකයන්, නිෂ්පාදකයන්, බෙදාහරින්නන් සහ ආයෝජකයන් විසින් තීරණය කරනු ලබන බව විපක්ෂ නායක සජිත් ප්රේමදාස මහතා පැවසීය. කොළඹ සිනමන් ලයිෆ් (Cinnamon Life) පරිශ්රයේදී පැවැති Vestige ආයෝජක සහ අලෙවිකරුවන්ගේ (Investor and Dealer) සමුළුව අමතමින් විපක්ෂ නායකවරයා මේ බව කියා සිටියේය.
මෙහිදී ශ්රී ලංකාව සහ ඉන්දියාව අතර පවතින දිගුකාලීන සංස්කෘතික, ආධ්යාත්මික හා ආර්ථික සබඳතා ඉස්මතු කළ සජිත් ප්රේමදාස මහතා, UPI ගෙවීම් පද්ධතිය ඒකාබද්ධ කිරීම සහ යෝජිත ද්විපාර්ශ්වික බලශක්ති සම්බන්ධතා ව්යාපෘති වැනි මුලපිරීම් හරහා දෙරටේ සහයෝගිතාව තවදුරටත් ශක්තිමත් වන අතරම ආර්ථික වර්ධනය සඳහා නව අවස්ථා ද නිර්මාණය වන බව පෙන්වා දුන්නේය.
මෙරට ආර්ථිකයේ ඉදිරි දැක්ම සහ ව්යාපාරික ක්ෂේත්රයේ නව පරිවර්තනයන් පිළිබඳව අදහස් දක්වමින් විපක්ෂ නායකවරයා මෙසේ අවධාරණය කළේය.
“ශ්රී ලංකාව මුහුණ දුන් මෑතකාලීන ආර්ථික අර්බුදය තුළ රටක් ලෙස අප ලැබූ අත්දැකීම් අනුව, නිදහස් වෙළෙඳපොළේ පවතින කාර්යක්ෂමතාව සමඟ සමාජ සාධාරණත්වය, විනිවිදභාවය සහ සමාන අවස්ථා ඒකාබද්ධ කෙරෙන ‘සමාජ වෙළෙඳපොළ ආර්ථිකයක්’ රට තුළ ගොඩනැඟීම අත්යවශ්යයි. ආර්ථික ප්රගතියේ ප්රතිලාභ සමාජයේ සියලුම කොටස්වලට සාධාරණව ලැබෙන, සැවොම ඇතුළත් කරගත් ආර්ථික වර්ධනයක් (Inclusive Growth) කෙරෙහි අප විශ්වාසය තැබිය යුතුයි. විශේෂයෙන්ම ස්වයංක්රීයකරණය සහ කෘත්රිම බුද්ධිය (AI) මඟින් ලෝකය වේගයෙන් හැඩගැසෙන වත්මන් යුගයක, පාරිභෝගික විශ්වාසය සහ ගුණාත්මක සේවාව ඕනෑම ව්යාපාරයක වටිනාම වත්කම වෙනවා.”
රැකියා නිර්මාණය කිරීම, ධනය උත්පාදනය කිරීම සහ දේශීය ප්රජාවන්ට සහය වීම සඳහා අලෙවිකරුවන්, බෙදාහරින්නන්, නිෂ්පාදකයන් සහ ව්යවසායකයන් ඉටුකරන සුවිශේෂී කාර්යභාරය ද මෙහිදී විපක්ෂ නායකවරයාගේ ඇගයීමට ලක්විය. ශ්රී ලංකාව හා ඉන්දියාව අතර ඇති ශක්තිමත් ආර්ථික ඒකාබද්ධතාවය, කලාපීය වෙළෙඳාම සහ ආයෝජන සඳහා පෙර නොවූ විරූ අවස්ථා නිර්මාණය කරමින් පවතින බැවින් නවෝත්පාදනය සහ ව්යාපාරික ව්යාප්තිය වැලඳ ගැනීමට පෙරමුණ ගන්නා ලෙස ද ඔහු ව්යාපාරික ප්රජාවගෙන් ඉල්ලා සිටියේය.
