ඉදිරි සති දෙක ඇතුළත අමෙරිකා එක්සත් ජනපදය ඉරානයට එරෙහිව සම්පූර්ණ ජයග්රහණයක් ප්රකාශයට පත් කිරීමට සූදානම් වන බව අමෙරිකානු ජනාධිපති ඩොනල්ඩ් ට්රම්ප් පවසයි. දෙපාර්ශ්වය අතර මේ වන විට ඉතා සාර්ථක මට්ටමේ සාකච්ඡා වට කිහිපයක් පැවැත්වෙමින් පවතින බවත්, ඉරානය ඉතා යහපත් එකඟතාවකට පැමිණීමට කැමැත්තෙන් පසුවන බවත් ජනාධිපතිවරයා සඳහන් කළේය.
වත්මන් රාජ්යතාන්ත්රික තත්ත්වය සහ එහි ප්රගතිය පිළිබඳව මාධ්ය වෙත අදහස් දක්වමින් ඩොනල්ඩ් ට්රම්ප් මෙසේ අවධාරණය කළේය.
“අපි දැන් ඉරානය සමඟ ඉතා සමීපව සාකච්ඡා පවත්වමින් ඉන්නවා. ඔවුන් අපට සියල්ල ලබාදීමට සූදානම් වගේම, ඔවුන්ට න්යෂ්ටික අවි අවශ්ය නැති බව පැවසීමටත් ඔවුන් මේ වන විට සූදානමින් සිටිනවා. මම හිතන්නේ අපි ඒ සටන ජයග්රහණය කරමින් ඉන්නේ. ඉදිරි සති දෙක තුළ අප සම්පූර්ණ ජයග්රහණයක් ප්රකාශයට පත් කරන විට ලෝකයම එය දකිනු ඇත. එය ඉතා ඉක්මනින් සිදුවන සම්පූර්ණ ජයග්රහණයක් වනු ඇති අතර, එමඟින් ලෝක වෙළෙඳපොළේ තෙල් මිලද ශීඝ්රයෙන් පහත වැටෙනු තිබෙනවා.”
කෙසේවෙතත්, ජනාධිපති ට්රම්ප් විසින් සති දෙකක් ඇතුළත මෙවැනි සැලකිය යුතු ප්රගතියක් ලබා දෙන බවට පොරොන්දු වූ පළමු අවස්ථාව මෙය නොවන බව විදෙස් මාධ්ය වාර්තා කර සිටියි. පසුගිය අප්රේල් 7 වැනිදා ප්රකාශයට පත් කරන ලද ඉරානය සමඟ සටන් විරාමය, දෙපාර්ශ්වය අතර යුද්ධය සම්පූර්ණයෙන්ම අවසන් කිරීමේ ගිවිසුමකට එළඹෙන තෙක් මුලින් සති දෙකක කාලයක් පවතිනු ඇතැයි අපේක්ෂා කළ ද එය තවදුරටත් ඇදී ගොස් තිබේ.
ජනාධිපතිවරයා නැවත නැවතත් පවසන පරිදි ඉරානය ගිවිසුමකට එළඹීමට එතරම් උනන්දුවකින් පසුවන්නේ නම්, ඔවුන් මෙතෙක් ඊට නිල වශයෙන් එකඟ නොවූයේ මන්දැයි මාධ්යවේදියෙකු නැඟූ ප්රශ්නයකට පිළිතුරු දෙමින් ට්රම්ප් කියා සිටියේ, “මොකද ඔවුන් ශක්තිමත්, ඒ වගේම ආඩම්බරයි. ඔවුන් කිසිදාක කරාවි කියා නොසිතූ, නමුත් දැන් ඔවුන්ට කරන්නට සිදුවන දේවල් තිබෙනවා. ඔවුන්ට වෙනත් කිසිදු විකල්පයක් නැහැ. ඒ සඳහා තව සුළු කාලයක් ගතවනු ඇත,” යනුවෙනි.
