මෙරට තරුණ ක්රීඩක ක්රීඩිකාවන් දිරිමත් කරමින් ශ්රී ලංකාවේ අනාගත ක්රීඩා සංචිතය ශක්තිමත් කිරීමේ අරමුණින් ක්රියාත්මක රජයේ “ක්රීඩා ශක්ති” වැඩසටහන යටතේ, දක්ෂතා සපිරි පාසල් ක්රීඩක ක්රීඩිකාවන් 1,500ක් සඳහා මාසික පෝෂණ දීමනා පිරිනැමීම ආරම්භ කර තිබේ.
තරුණ කටයුතු හා ක්රීඩා අමාත්යාංශයේදී පැවැති විශේෂ උත්සවයකදී මෙහි සංකේතාත්මක දීමනා පිරිනැමීම සිසු සිසුවියන් 100 දෙනෙකු වෙනුවෙන් සිදු කෙරිණි. මෙම දීමනා ක්රමවේදය යටතේ තේරී පත් වූ එක් ක්රීඩකයෙකු සඳහා මාර්තු මාසයේ සිට දෙසැම්බර් මාසය දක්වා මසකට රුපියල් 10,000 බැගින්, සමස්තයක් ලෙස රුපියල් 100,000ක මුදලක් හිමි වීමට නියමිතය.
මෙම ප්රතිලාභීන් තෝරාගෙන ඇත්තේ 2025 ජාතික පාසල් ක්රීඩා උළෙල, පළාත් මට්ටමේ තරඟ සහ ජාත්යන්තර ක්රීඩා ඉසව්වලදී ඔවුන් දැක්වූ දක්ෂතා සහ දස්කම් සලකා බලමින් සිදු කළ විධිමත් ක්රියාවලියක් මඟිනි.
මෙහිදී උත්සවය අමතමින් තරුණ කටයුතු හා ක්රීඩා ඇමැති සුනිල් කුමාර ගමගේ මහතා මෙසේ අවධාරණය කළේය.
“මූල්යමය දුෂ්කරතා හේතුවෙන් මෙරට දක්ෂ ක්රීඩක ක්රීඩිකාවන්ට තමන්ගේ ක්රීඩා සිහින අතහැර දැමීමට සිදුවන තත්ත්වය නැති කිරීමට රජය කැපවී සිටිනවා. ආර්ථික අපහසුතා හෝ ක්රීඩා උපකරණ හිඟකම නිසා කිසිදු දක්ෂ ක්රීඩකයෙකුට තම ගමන නතර කිරීමට අප ඉඩ තබන්නේ නැහැ. ඔබට යම් අඩුපාඩුවක් හෝ ගැටලුවක් පවතින්නේ නම් ඒ පිළිබඳව සෘජුවම අමාත්යාංශය දැනුවත් කරන්න. අවශ්ය සියලුම පහසුකම් සලසා දීමට අප සූදානම්.”
මෙම නව පෝෂණ දීමනා වැඩපිළිවෙළ හරහා ග්රාමීය මට්ටමේ සිටින දක්ෂ පාසල් ක්රීඩක ක්රීඩිකාවන්ගේ පෝෂණ තත්ත්වය ඉහළ නංවාලීමටත්, ඔවුන් ජාත්යන්තර ජයග්රහණ කරා මෙහෙයවීමටත් ක්රීඩා අමාත්යාංශය අපේක්ෂා කරයි.
