ඇමෙරිකා එක්සත් ජනපදය විසින් ශ්රී ලංකාව ඇතුළු රටවල් කිහිපයක අපනයන භාණ්ඩ සඳහා යෝජනා කර ඇති 12.5%ක නව ශ්රම-සම්බන්ධ තීරුබදු පැනවීම පිළිබඳව ලංකා වාණිජ මණ්ඩලය සිය දැඩි කනස්සල්ල පළ කර තිබේ. දෙරට අතර වඩාත් වාසිදායක වෙළඳ ගිවිසුමක් සඳහා සාකච්ඡා පැවැත්වෙන පසුබිමක මෙම තීරණය ක්රියාත්මක වීම ශ්රී ලංකාවේ අපනයන අංශයට විශාල අභියෝගයක් බව වාණිජ මණ්ඩලය පෙන්වා දෙයි.
මෙම යෝජිත තීරුබදු හේතුවෙන් මතුවිය හැකි අහිතකර තත්ත්වයන් පිළිබඳව වාණිජ මණ්ඩලය කරුණු කිහිපයක් අවධාරණය කරයි. අනෙකුත් රටවල් 10%ක අඩු තීරුබදු අනුපාතිකයකට යටත් වෙද්දී ශ්රී ලංකාවට 12.5%ක ඉහළ තීරුබද්දක් පැනවීම අපනයන ක්ෂේත්රයේ තරඟකාරීත්වය බරපතළ ලෙස බිඳ දමනු ඇත. වසරේ මුල් මාස හතර තුළදී ඇඟලුම් අංශය 7%කින් සහ තේ අපනයනය 6%කින් දැනටමත් පහත වැටී ඇති අතර, නව වෙළඳ බාධක හේතුවෙන් මෙම තත්ත්වය තවත් උග්ර විය හැකිය. ශ්රී ලංකාව වගකිවයුතු මූලාශ්ර සහිත රටක් ලෙස ඉහළ ශ්රම, පාරිසරික සහ පාලන ප්රමිතීන්ට අනුකූලව කටයුතු කරන බවත්, සදාචාරාත්මක ව්යාපාරික භාවිතයන් සම්බන්ධයෙන් රට ප්රගතියක් ලබා ඇති බවත් වාණිජ මණ්ඩලය සිහිපත් කරයි.
මේ සම්බන්ධයෙන් කඩිනමින් මැදිහත් වන ලෙස ලංකා වාණිජ මණ්ඩලය රජයෙන් ඉල්ලා සිටී. විශේෂයෙන්ම යෝජිත තීරුබදු සඳහා පදනම් වූ කරුණු අධ්යයනය කර, ඉහළම රාජ්යතාන්ත්රික මට්ටමින් අමෙරිකානු බලධාරීන් සමඟ සාකච්ඡා කර මෙම බදු අඩු කර ගැනීමට හෝ සම්පූර්ණයෙන්ම ඉවත් කර ගැනීමට පියවර ගන්නා ලෙස ඔවුහු රජයට දන්වා සිටිති.
ශ්රී ලංකාවේ ආර්ථික ස්ථාවරත්වය සහ අපනයනකරුවන්ගේ විශ්වාසය ආරක්ෂා කර ගැනීම උදෙසා පවතින වෙළඳ සාකච්ඡා සාර්ථක කර ගනිමින් නැවතත් අඩු තීරුබදු කාණ්ඩයට පිවිසීම අත්යවශ්ය බව වාණිජ මණ්ඩලය වැඩිදුරටත් අවධාරණය කරයි.
