‘දිට්වා’ සුළිකුණාටුවෙන් හානියට පත් එක් එක් පාසලේ වත්මන් තත්ත්වය පිළිබඳ සවිස්තරාත්මක වාර්තාවක් සතියක් ඇතුළත තමන් වෙත ලබාදෙන ලෙස අග්රාමාත්ය හරිනි අමරසූරිය මහත්මිය අදාළ නිලධාරීන්ට උපදෙස් ලබා දී තිබේ. වතු ආශ්රිත පාසල් මුහුණ දෙන ගැටලු සම්බන්ධයෙන් අද (09) පාර්ලිමේන්තුවේ පැවැති විශේෂ සාකච්ඡාවකදී අග්රාමාත්යවරිය මෙම නියෝගය නිකුත් කළාය. මෙහිදී ඌව, සබරගමුව සහ මධ්යම පළාත්වල ‘දිට්වා’ කුණාටුව නිසා පූර්ණ හෝ අර්ධ හානි සිදුවූ වතු පාසල් මෙන්ම වෙනත් ආරක්ෂිත ස්ථාන වෙත ගෙනයා යුතු පාසල් පිළිබඳව ද දීර්ඝ ලෙස අවධානය යොමු විය.
එහිදී අග්රාමාත්යවරිය අවධාරණය කළේ හානියට පත් පාසල්වල දරුවන් වෙනත් පාසල්වලට තාවකාලිකව අනුයුක්ත කිරීම පමණක් ප්රමාණවත් නොවන බවයි. එම දරුවන් නිසි ලෙස පාසල් පැමිණෙන්නේද සහ ඔවුන් මුහුණ දෙන දුෂ්කරතා මොනවාද යන්න පිළිබඳව අඛණ්ඩව පසු විපරම් (Follow-up) කළ යුතු බව ඇය පෙන්වා දුන්නාය. එමෙන්ම දරුවන්ගේ අධ්යාපනය අඩාල වීම වැළැක්වීම සඳහා තාවකාලික පාසල් ගොඩනැඟිලි කඩිනමින් ඉදිකිරීමට පියවර ගත යුතු බව ද ඇය සඳහන් කළාය.
වතුකරයේ දෙමළ මාධ්ය පාසල්වල පවතින දැඩි ගුරු පුරප්පාඩු පිරවීම සඳහා වෙනම දෙමළ ගුරුවරුන් පුහුණු කිරීමේ වැඩසටහන් ක්රියාත්මක වන බව පැවසූ අග්රාමාත්යවරිය, මෙවර ගුරු බඳවා ගැනීම්වලදී පළාත් පාසල්වල ගුරු පුරප්පාඩුවලින් 50%ක්ම පිරවීමට රජය අපේක්ෂා කරන බව ද කියා සිටියාය. මීට අමතරව වතු ආශ්රිත පාසල් දරුවන් සඳහා වසර 13ක අඛණ්ඩ අධ්යාපනය තහවුරු කිරීමටත්, ඔවුන්ට අවශ්ය වෘත්තීය අධ්යාපනය (Vocational Training) දෙමළ භාෂාවෙන්ම ලබාදීමටත් රජය විශේෂ අවධානයක් යොමු කර ඇති බව ද ඇය මෙහිදී වැඩිදුරටත් ප්රකාශ කළාය.
