ශ්රී ලංකා පාර්ලිමේන්තුවේ ස්වාධීන අයවැය විශ්ලේෂණ හැකියාවන් ශක්තිමත් කිරීමේ අරමුණින්, අමෙරිකානු විශේෂඥ දූත පිරිසක් මේ වන විට කොළඹ සංචාරයක නිරත වෙමින් සිටිති.
ජුනි 8 සිට 12 දක්වා පැවැත්වෙන මෙම සතියක තාක්ෂණික සහය හුවමාරු වැඩසටහන සඳහා අමෙරිකානු නියෝජිත මන්ත්රී මණ්ඩලයේ ප්රජාතන්ත්රවාදී හවුල්කාරිත්වයේ (HDP) වැඩසටහන් කළමනාකාරිනී මීගන් මුවර් සහ අමෙරිකානු කොංග්රස් අයවැය කාර්යාලයේ (CBO) විශේෂඥයින් වන මීගන් කැරොල් සහ ක්රිස්ටි හෝලි ඇන්තනි යන මහත්මීන් එක්ව සිටිති.
මෙම වැඩසටහන හරහා මන්ත්රීවරුන් සහ පාර්ලිමේන්තු කාර්ය මණ්ඩලය ඇතුළු 100ක පමණ පිරිසක් සමඟ අමෙරිකානු හොඳම භාවිතයන් හුවමාරු කරගැනීමට නියමිතය. එහිදී රජයේ වියදම් සහ රාජ්ය ප්රතිපත්ති පිළිබඳ පක්ෂග්රාහී නොවන අධීක්ෂණය සඳහා අවශ්ය මඟපෙන්වීම් ලබාදීමට කටයුතු කෙරේ.
පාර්ලිමේන්තු මන්ත්රීවරුන් සහ රාජ්ය මූල්ය කාරක සභාවේ (COPF) කාර්ය මණ්ඩලය සමඟ සිදුකරන වැඩමුළු තුළින් පාර්ලිමේන්තු අයවැය කාර්යාලයක (PBO) සැලසුම සහ ව්යුහය සකස් කිරීම, මන්ත්රීවරුන්ට අවශ්ය තොරතුරු හඳුනා ගැනීම සහ දිගුකාලීන ආයතනික ධාරිතාව වැඩිදියුණු කිරීම සඳහා මාර්ග සිතියමක් සකස් කිරීම කෙරෙහි අවධානය යොමු කර ඇත.
අමෙරිකානු තානාපති කාර්යාලය පවසන පරිදි, අමෙරිකානු කොංග්රසය අයවැය සහ ආර්ථික ගැටලු පිළිබඳ වෛෂයික විශ්ලේෂණ ලබා ගැනීම සඳහා ස්වාධීන ආයතනයක් වන CBO මත රඳා පවතී. යෝජිත ප්රතිපත්ති සහ නීතිවල පිරිවැය, ආර්ථික බලපෑම් සහ දිගුකාලීන මූල්ය ඇඟවුම් තක්සේරු කිරීමට ලොව පුරා බොහෝ රටවල ව්යවස්ථාදායකයන් සඳහා මෙවැනි ආයතන සහාය වේ.
ශ්රී ලංකා පාර්ලිමේන්තුවේ අධීක්ෂණ බලය සහ සාක්ෂි පදනම් කරගත් ප්රතිපත්ති සම්පාදනය ශක්තිමත් කිරීමේ උත්සාහයේ කොටසක් ලෙස මෙම පාර්ලිමේන්තු අයවැය කාර්යාලය ස්ථාපිත කිරීමට පියවර ගැනේ. මෙම වැඩසටහනට සමගාමීව, ඉදිරි සැප්තැම්බර් මාසයේදී තෝරාගත් මන්ත්රීවරුන් පිරිසකට අමෙරිකානු පාර්ලිමේන්තු ක්රමවේදයන් පිළිබඳව සෘජුව අධ්යයනය කිරීමට අවස්ථාවක් ලබා දීමට ද අමෙරිකානු තානාපති කාර්යාලය බලාපොරොත්තු වේ.
