තිස්සමහාරාම – කිරින්ද මාර්ගයේදී අධික වේගයෙන් ධාවනය වූ කැබ් රථයක් රියදුරුට පාලනය කරගත නොහැකිව මාර්ගයෙන් ඉවතට පැන වෙළඳසැලක දරුණු ලෙස ගැටීමෙන් මාරක රිය අනතුරක් සිදුව තිබේ. ඊයේ (11) අලුයම කාලයේදී සිදුවූ මෙම අනතුරෙන් කැබ් රථයේ ගමන් ගත් සිව්දෙනෙකුම බරපතල තුවාල ලබා ඇති අතර, ප්රදේශවාසීන් සහ පොලිසිය එක්ව වහාම ඔවුන් සියලු දෙනා රෝහල්ගත කිරීමට පියවර ගෙන තිබුණි.
කෙසේ වෙතත්, රෝහල්ගත කිරීමෙන් අනතුරුව එහි ගමන් ගත් 70 හැවිරිදි වයෝවෘද්ධ පුද්ගලයෙකු ප්රතිකාර ලබමින් සිටියදී අවාසනාවන්ත ලෙස ජීවිතක්ෂයට පත්ව ඇත. මෙලෙස මියගොස් ඇත්තේ හොරණ ප්රදේශයේ පදිංචිව සිටි අයෙකු බව පොලිස් විමර්ශනවලදී හඳුනාගෙන තිබේ. අනතුරෙන් තුවාල ලැබූ කැබ් රථයේ රියදුරු ඇතුළු අනෙක් තිදෙනා මේ වන විටත් රෝහලේ දැඩි සත්කාර ඒකකවල ප්රතිකාර ලබමින් පසුවෙති. නිදිමත හෝ අධික වේගය හේතුවෙන් රථ වාහන පාලනය කරගත නොහැකිව සිදුවන මෙවැනි මාරක මාර්ග අනතුරු වර්ධනය වීම පිළිබඳව තිස්සමහාරාම පොලිසිය රියදුරන්ගෙන් ඉල්ලා සිටින්නේ අවධානයෙන් ධාවනය කරන ලෙසයි.
