රට තුළ සීඝ්රයෙන් පැතිර යන ඩෙංගු වසංගත තත්ත්වය පාලනය කිරීමේ අරමුණින්, හෙට (15) දින සිට යළිත් වරක් ජාතික ඩෙංගු මර්දන සතියක් ක්රියාත්මක කිරීමට සෞඛ්ය බලධාරීන් පියවර ගෙන තිබේ. පවතින වැසි සහිත කාලගුණික තත්ත්වයත් සමඟ ඩෙංගු රෝගීන් වාර්තා වීමේ අනුපාතය සතිපතා වාර්තා වන සාමාන්ය මට්ටම වන දහස ඉක්මවා ගොස් ඉතා ඉහළ අගයකට පැමිණීම බරපතළ මහජන සෞඛ්ය අවදානමක් ලෙස විශේෂඥ වෛද්යවරුන් විසින් පෙන්වා දී ඇත.
මෙම ව්යාපෘතිය යටතේ රජයේ ආයතන, පාසල්, සේවා ස්ථාන සහ සියලුම නිවාස පරිශ්රයන් පිරිසිදු කර මදුරු කීටයන් බෝවන ස්ථාන විනාශ කිරීමට පියවර ගනු ලබන අතර, ඒ පිළිබඳ අධීක්ෂණය මහජන සෞඛ්ය පරීක්ෂකවරුන් හරහා සිදු කෙරේ. නියෝජ්ය අමාත්ය රුවන් සෙනරත් මහතාගේ ප්රධානත්වයෙන් සහ පළාත් නවයේම ප්රධාන ලේකම්වරුන්ගේ සහභාගීත්වයෙන් පැවැති සාකච්ඡාවකදී, ජාතික ඩෙංගු මර්දන ඒකකය, සෞඛ්ය අමාත්යාංශය, අධ්යාපන අමාත්යාංශය සහ පොලීසිය ඇතුළු ආයතන කිහිපයක ඒකාබද්ධ දායකත්වයෙන් මෙම සතියේ වැඩසටහන් ක්රියාත්මක කිරීමට තීරණය වී ඇත.
ඩෙංගු රෝග ව්යාප්තියේ මෙම තීරණාත්මක හැරවුම පාලනය කිරීමට නම් ජනතාවගේ දායකත්වය අත්යවශ්ය වන බව සෞඛ්ය අංශ අවධාරණය කරයි. අඛණ්ඩව නිවෙස් සහ අවට පරිසරය පිරිසිදුව තබා ගැනීම මගින් මෙම සෞඛ්ය අවදානම අවම කරගත හැකි අතර, නොසැලකිලිමත්කම හේතුවෙන් උද්ගත විය හැකි සෞඛ්ය අර්බුදයකට ඉඩ නොදෙන ලෙස බලධාරීන් මහජනතාවගෙන් ඉල්ලා සිටී.
