කෝපායි පොලිස් ස්ථානය සඳහා ඉදිකරන ලද නවීන පහසුකම්වලින් සමන්විත නව ගොඩනැගිල්ල අද (14) මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතාගේ ප්රධානත්වයෙන් ජනතා සේවයට විවෘත කෙරිණි. රුපියල් කෝටි 04කට ආසන්න මුදලක් වැය කර වසරක් වැනි කෙටි කාලයක් තුළ මෙම ගොඩනැගිල්ලේ ඉදිකිරීම් අවසන් කර ඇත.
ජනතාව වෙත වඩාත් කාර්යක්ෂම හා ගුණාත්මක පොලිස් සේවාවක් සැපයීම මෙම ව්යාපෘතියේ මූලික අරමුණයි. උත්සව අවස්ථාවේදී පැරණි පොලිස් ගොඩනැගිල්ල පිහිටා තිබූ භූමිය එහි නීත්යානුකූල අයිතිකරුවන් හත් දෙනෙකු වෙත නැවත පවරාදීම සංකේතවත් කරමින් නිවාස යතුරු ප්රදානය කිරීම ද අමාත්යවරයාගේ ප්රධානත්වයෙන් සිදු විය.
උත්සව සභාව අමතමින් අමාත්ය ආනන්ද විජේපාල මහතා අවධාරණය කළේ, කිසිදු ජාතිවාදී හෝ ආගමික භේදයකින් තොරව සියලුම ශ්රී ලාංකික ජනතාවගේ ආරක්ෂාව තහවුරු කිරීම රජයේ ප්රමුඛ වගකීමක් බවයි. මත්ද්රව්ය උවදුරින් රට මුදා ගැනීම සඳහා ආරක්ෂක අංශ සමඟ එක්ව ක්රියාත්මක කරන වැඩපිළිවෙළ තවදුරටත් ශක්තිමත් කරන බවත්, ඒ සඳහා මහජන සහයෝගය අත්යවශ්ය බවත් ඔහු වැඩිදුරටත් පැවසීය.
මෙම අවස්ථාව සඳහා උතුරු පළාත් ආණ්ඩුකාර නාගලිංගම් වේදනායගම් මහතා, යාපනය දිස්ත්රික් පාර්ලිමේන්තු මන්ත්රී කරුණානාදන් ඉලන්කුමරන් මහතා ඇතුළු දේශපාලන නියෝජිතයින්, පොලිස්පති ප්රියන්ත වීරසූරිය මහතා සහ ශ්රී ලංකා පොලිසියේ ජ්යෙෂ්ඨ නිලධාරීන් ඇතුළු පිරිසක් සහභාගී වූහ.
