මෙවර පොසොන් උත්සව සමයේදී අනුරාධපුර පූජා නගරය මුළුමනින්ම කසළවලින් තොර කලාපයක් බවට පත් කිරීමට අනුරාධපුර නගර සභාව ඇතුළු අදාළ අංශ ඒකමතිකව තීරණය කර තිබේ.
සාමාන්යයෙන් පොසොන් උත්සව සමය තුළදී පමණක් අනුරාධපුර නගරයෙන් කසළ මෙට්රික් ටොන් 500ක් වැනි අතිවිශාල ප්රමාණයක් එකතු වන බව නගර සභා නිලධාරීන් පෙන්වා දෙයි. මේ හේතුවෙන් නගරය පිරිසිදුව තබා ගැනීම පිළිබඳව අනුරාධපුර දිස්ත්රික් ලේකම් රංජිත් විමලසූරිය, උතුරු මැද පළාත් නියෝජ්ය පොලිස්පති එන්. අයි. සුගතපාල, නාගරික කොමසාරිස් එච්. ආර්. නිශාන්ත සහ නගරාධිපති එන්. කරුණාරත්න යන මහත්වරුන්ගේ ප්රධානත්වයෙන් විශේෂ සාකච්ඡාවක් පවත්වා ඇත.
එහිදී ගනු ලැබූ තීරණවලට අනුව, අනුරාධපුර පූජා නගරයට ඇතුළු වන සියලුම රථවාහන සඳහා කසළ වෙන් කර දැමීමට හැකි වන පරිදි පොලිතින් බහාලුම් (කවර්) දෙක බැගින් ලබා දීමට පියවර ගැනේ. බැතිමතුන් වෙනුවෙන් අවශ්ය සියලුම යටිතල පහසුකම් නගරය තුළ සලසා ඇති බැවින්, පරිසරයට හානි සිදුවන අනවශ්ය දෑ නගරයට රැගෙන ඒමෙන් වළකින ලෙස දිස්ත්රික් ලේකම්වරයා මෙහිදී ඉල්ලා සිටියේය.
එසේම බැතිමතුන්ගේ ආරක්ෂාව වෙනුවෙන් විශේෂ ආරක්ෂක වැඩපිළිවෙළක් ක්රියාත්මක වන අතර, වැව්වලින් දිය නෑම සිදුකළ යුත්තේ පොලිස් ජීවිතාරක්ෂක කණ්ඩායම් ස්ථානගත කර සිටින ස්ථානවලදී පමණක් බවට ද දැනුම් දී තිබේ. පොසොන් වන්දනාවේ පැමිණෙන සියලුම ජනතාවගෙන් බලධාරීන් කාරුණිකව ඉල්ලා සිටින්නේ සූදානම් කර ඇති මෙම වැඩපිළිවෙළට සහය දක්වමින්, පරිසරය ද සුරකිමින් ආරක්ෂිතව සිය වන්දනා කටයුතු නිම කරන ලෙසයි.
