සේවක අර්ථසාධක අරමුදල (EPF) සහ සේවක භාරකාර අරමුදල (ETF) යන ආයතන දෙකේ මෙහෙයුම් කටයුතු ඒකාබද්ධ කොට, පොදු පාලන රාමුවක් යටතට පත් කිරීමේ ශක්යතාව අධ්යයනය කිරීම සඳහා ජ්යෙෂ්ඨ නිලධාරීන්ගෙන් සමන්විත කමිටුවක් පත් කිරීමට අමාත්ය මණ්ඩලය අනුමැතිය ලබා දී ඇත.
මෙම යෝජනාව ගෙන එන ලද්දේ කම්කරු අමාත්යවරයා විසිනි. රජය, සේවායෝජකයින් සහ සේවකයින් යන පාර්ශ්ව තුන නියෝජනය වන පරිදි එක් පොදු ත්රිපාර්ශ්වික (Tripartite) පාලන රාමුවක් යටතට මෙම අරමුදල් දෙකම ගෙන ඒමේ හැකියාව සොයා බැලීම මෙම කමිටුවේ ප්රධාන අරමුණයි.
1958 වසරේදී ආරම්භ කරන ලද සේවක අර්ථසාධක අරමුදල (EPF) සාමාජිකයින් මිලියන 2.5කට අධික සංඛ්යාවක් ආවරණය කරන අතර රුපියල් ට්රිලියන 4.9කට අධික වත්කම් ප්රමාණයක් කළමනාකරණය කරයි. මෙහි භාරකාරත්වය සහ ආයෝජන කළමනාකරණය ශ්රී ලංකා මහ බැංකුව විසින් සිදු කරන අතර, ලියාපදිංචි කිරීම් සහ නීතිමය ආරක්ෂාව කම්කරු දෙපාර්තමේන්තුව හරහා සිදුවේ. 1980 වසරේදී ආරම්භ කරන ලද සේවක භාරකාර අරමුදල (ETF) සාමාජිකයින් මිලියන 3කට අධික සංඛ්යාවක් ආවරණය කරන අතර එහි වත්කම් වටිනාකම රුපියල් බිලියන 637.5 ඉක්මවයි. මෙය දැනටමත් සේවායෝජකයින් සහ සේවකයින් නියෝජනය වන ත්රිපාර්ශ්වික මණ්ඩලයක් මගින් කළමනාකරණය කෙරේ.
ජාත්යන්තර කම්කරු සංවිධානය (ILO) විසින් ප්රවර්ධනය කරන මෙම ත්රිපාර්ශ්වික පාලන ආකෘතිය ජාත්යන්තරව පිළිගත් සාර්ථක ක්රමවේදයක් ලෙස සැලකේ. අනාගතයේදී මෙම අරමුදල් දෙකේ කාර්යක්ෂමතාව වැඩි කිරීම සහ කළමනාකරණය විධිමත් කිරීම මෙම ඒකාබද්ධ කිරීමේ අපේක්ෂාවයි.
