ශ්රී ලංකාව ගෝලීය මැණික් හා ස්වර්ණාභරණ මධ්යස්ථානයක් ලෙස තවදුරටත් ශක්තිමත් කිරීමේ අරමුණින් සංවිධානය කෙරෙන “Gem City Ratnapura 2026” ජාත්යන්තර ප්රදර්ශනය එළඹෙන අගෝස්තු 31 සිට සැප්තැම්බර් 2 දක්වා රත්නපුරයේදී පැවැත්වීමට සැලසුම් කර ඇති බව කර්මාන්ත හා ව්යවසායකත්ව සංවර්ධන නියෝජ්ය අමාත්ය චතුරංග අබේසිංහ මහතා ප්රකාශ කළේය. අද (18) රජයේ ප්රවෘත්ති දෙපාර්තමේන්තුවේ පැවති මාධ්ය හමුවකට එක්වෙමින් ඔහු කියා සිටියේ ජාතික මැණික් හා ස්වර්ණාභරණ අධිකාරිය (NGJA) මඟින් තෙවැනි වරටත් සංවිධානය කරන මෙම ප්රදර්ශනය, රත්නපුරය ජාත්යන්තර මැණික් වෙළෙඳ කේන්ද්රස්ථානයක් බවට පත් කිරීමේ දිගුකාලීන සැලැස්මේ වැදගත් පියවරක් වන බවයි. මැණික් කැණීම්, නිෂ්පාදන හා අපනයන ක්ෂේත්රවල පවතින බාධා අවම කරමින් කර්මාන්තය සංවර්ධනය කිරීම රජයේ අපේක්ෂාව බව ද ඔහු සඳහන් කළේය.
කර්මාන්ත හා ව්යවසායකත්ව සංවර්ධන අමාත්යාංශය සහ ලංකා මැණික් ව්යාපාරිකයින්ගේ හා පතල්කරුවන්ගේ සංගමය ඇතුළු පාර්ශ්වකරුවන්ගේ සාමූහික දායකත්වයෙන් පැවැත්වෙන මෙම ප්රදර්ශනය හරහා, දේශීය ශිල්පීය කුසලතා මෙන්ම ආයෝජන අවස්ථා ජාත්යන්තර ගැනුම්කරුවන් වෙත ඉදිරිපත් කිරීමට නියමිතය. මෙවර ප්රදර්ශනය සඳහා ප්රදර්ශන කුටි 60කට ආසන්න සංඛ්යාවක් ස්ථාපිත කිරීමට සැලසුම් කර ඇති අතර, මහා පරිමාණ අපනයනකරුවන්ට මෙන්ම කුඩා හා මධ්ය පරිමාණ ව්යවසායකයින්ට ද සිය නිෂ්පාදන ප්රදර්ශනය කිරීමට මෙහිදී අවස්ථාව හිමි වේ. ජාත්යන්තර ප්රදර්ශන දින දර්ශනයට සමගාමීව මෙය සංවිධානය කර ඇති බැවින්, විදේශීය ගැනුම්කරුවන්ට මෙරටට පැමිණ නව ව්යාපාරික අවස්ථා සොයා බැලීමට කදිම අවස්ථාවක් උදාවනු ඇත.
