වයස අවුරුදු 12ත් 13ත් අතර පසුවන දරුවන්ට HPV (Human Papillomavirus) එන්නත ලබා දීමෙන්, ඔවුන් වයස අවුරුදු 30ක් වීමට පෙර ගැබ්ගෙල පිළිකාවෙන් මිය යාමේ අවදානම සම්පූර්ණයෙන්ම පාහේ නැති වී යන බව නවතම බ්රිතාන්ය පර්යේෂණයකින් හෙළි වී තිබේ. ලන්ඩනයේ ක්වීන් මේරි විශ්වවිද්යාලයේ මහාචාර්ය පීටර් සාසියේනි මහතා ඇතුළු විද්යාඥයින් පෙන්වා දෙන්නේ, 2008 වසරේ සිට එංගලන්තයේ ක්රියාත්මක මෙම එන්නත්කරණය නිසා 2020 සහ 2024 වසරවල් අතර කාලය තුළ වයස අවුරුදු 20ත් 24ත් අතර පසුවන කිසිදු කාන්තාවකගේ ගැබ්ගෙල පිළිකා මරණයක් වාර්තා වී නොමැති බවයි. සමට සම ස්පර්ශ වීමෙන් බෝවන සහ ගැබ්ගෙල පිළිකාවලින් 99%කටම වගකිව යුතු මෙම වෛරසය මර්දනය කිරීමට එක් එන්නත් මාත්රාවකින් ලැබී ඇති මෙම සාර්ථකත්වය වෛද්ය ක්ෂේත්රයේ අදහාගත නොහැකි ජයග්රහණයකි. එක්සත් රාජධානිය තුළ තවමත් වසරකට නව රෝගීන් 3,300ක් පමණ වාර්තා වෙමින් කාන්තාවන් අතර 14 වැනියට බහුලවම දක්නට ලැබෙන පිළිකාව මෙය වුවද, එන්නත ලබාගත් පිරිස වයස්ගත වෙත්ම මෙම රෝගයෙන් සිදුවන මරණ සංඛ්යාව ඉදිරියේදී තවදුරටත් ශීඝ්රයෙන් පහත වැටෙනු ඇතැයි පර්යේෂකයෝ විශ්වාසය පළ කරති.
