ගොවි විරෝධතා සංවිධානය කරන ඇතැම් නායකයන්ගේ කුප්රකට තොරතුරු සහ ඔවුන් සිදුකරන දූෂිත ක්රියාවන් ඉදිරියේදී රට හමුවේ හෙළි කරන බව නියෝජ්ය අමාත්ය ටී.බී. සරත් මහතා පවසයි. අරණගංගංවිල ප්රදේශයේ පැවැති උත්සවයකදී අදහස් දක්වමින් අමාත්යවරයා අවධාරණය කළේ මෙම විරෝධතා පිටුපස සිටින්නේ සැබෑ ගොවියන් නොව විපක්ෂයේ දේශපාලන නියෝජිතයන් බවයි.
වත්මන් විරෝධතා මෙහෙයවනු ලබන්නේ සමගි ජන බලවේගය, එක්සත් ජාතික පක්ෂය සහ ඒකාබද්ධ විපක්ෂය නියෝජනය කරන දේශපාලන කණ්ඩායම් විසින් බවත්, ඔවුන්ගේ අරමුණ ගොවි ප්රශ්න විසඳීම නොව ආණ්ඩුව පෙරළා දැමීම බවත් ඔහු චෝදනා කරයි. ගොවි නායකයන් ලෙස පෙනී සිටින ඇතැම් පුද්ගලයන් රජයෙන් වරප්රසාද භුක්ති විඳින අතරම, ගම් මට්ටමින් කසිප්පු පෙරීම වැනි විවිධ දූෂිත ක්රියාවල නිරත වන බවට තොරතුරු ලැබී ඇතැයි ද අමාත්යවරයා පැවසීය. ඉදිරියේදී පවත්වනු ලබන මාධ්ය සාකච්ඡා මගින් මෙම පුද්ගලයන්ගේ තොරතුරු ජනතාවට හෙළි කරන බවට ඔහු අනතුරු ඇඟවීය.
මේ වන විට ගොවියන් සතුව විශාල වී තොග නොමැති බවත්, වැඩි වී තොග ප්රමාණයක් පවතින්නේ මෝල් හිමියන් සතුව බවත් හෙතෙම පෙන්වා දුන්නේය. වී අලෙවි මණ්ඩලය හරහා නැවත වී මිලදී ගැනීම් සිදු කරන්නේ ලබන කන්නයේ අස්වනු නෙළන අවස්ථාවේදී බව ඔහු වැඩිදුරටත් සඳහන් කළේය. ජනතාවගේ සැබෑ ප්රශ්න හඳුනාගෙන ඒවාට පිළිතුරු සෙවීමට රජය සූදානම් වුවද, දේශපාලන අරමුණු වෙනුවෙන් සුළු පිරිසක් යොදාගෙන සිදුකරන මෙවැනි උද්ඝෝෂණවලට ජනතාවගේ සහයක් නොමැති බවද නියෝජ්ය අමාත්ය ටී.බී. සරත් මහතා මෙහිදී වැඩිදුරටත් කියා සිටියේය.
