බිහාරයේ මුසාෆාර්පූර් දිස්ත්රික්කයේ තරුණයෙකු සිය බිරිඳ අතුරුදන් වීම සම්බන්ධයෙන් සමාජ මාධ්ය ඔස්සේ කළ ආයාචනයක් හේතුවෙන් බිහිසුණු ඝාතනයක් අනාවරණය වී තිබේ.
ගෞරි ශංකර් කුමාර් (22) සහ සුජාතා කුමාරි (19) අතර දිගු කලක සිට පැවති ප්රේම සම්බන්ධය හේතුවෙන් ඔවුන් ජනවාරි 18 වන දින නිවසින් පලා ගොස් විවාහ වී ඇත. කෙසේ වෙතත්, සුජාතාගේ පවුලේ අය විසින් තරුණයාට එරෙහිව පැමිණිල්ලක් ගොනු කර ඇති අතර, පසුව ඔවුන්ව පොලිස් අත්අඩංගුවට පත්වී අධිකරණයට ඉදිරිපත් කර ඇත.
අධිකරණයේදී සුජාතා තමන් කැමැත්තෙන් විවාහ වූ බවත්, සැමියා සමඟ ජීවත් වීමට අවශ්ය බවත් පවසා ඇතත්, ගෞරි ශංකර් බන්ධනාගාරගත කෙරිණි. එම කාලසීමාවේදී සුජාතා ඇගේ නැන්දණියකගේ භාරයේ පසුවිය. ගෞරි ශංකර් බන්ධනාගාරයෙන් නිදහස් වූ පසු සුජාතාව සොයා ගැනීමට උත්සාහ කළ ද, ඔහුට ඇයව මුණගැසීමට නොහැකි විය. ඇයගේ පවුලේ අය ඇයව නිවසට රැගෙන ගොස් සිටි බව වාර්තා වේ.
සිය බිරිඳ අතුරුදන් වීම සම්බන්ධයෙන් පොලිසිය නිසි පියවර නොගන්නා බවට චෝදනා කරමින් ගෞරි ශංකර් සමාජ මාධ්ය ඔස්සේ වීඩියෝවක් නිකුත් කර තිබුණි. එහිදී ඔහු පවසා තිබුණේ පොලිසිය ඇයව සොයා නොදුනහොත් තමා සියදිවි නසා ගන්නා බවයි. මෙම වීඩියෝව වෛරස් වීමත් සමඟ මුසාෆාර්පූර් පොලිසිය පරීක්ෂණ ආරම්භ කළේය.
පොලිස් පරීක්ෂණවලදී සුජාතාගේ සහෝදරයා වන අභිෂේක් කුමාර්ව ප්රශ්න කිරීමේදී ඇයගේ අතුරුදන් වීමේ සැබෑ හේතුව හෙළි විය.සහෝදරයා පාපොච්චාරණය කර ඇත්තේ, සුජාතා වෙනත් කුලයක අයෙකු සමඟ ප්රේම සම්බන්ධයක් පවත්වා පලා යාම හේතුවෙන් තමන් දැඩි කෝපයට පත්ව සිටි බවයි.සුජාතා නැන්දණියගේ භාරයේ සිටියදී ඇයව නිවසට ගෙන්වා ගෙන ඇති අතර, පසුව සහෝදරයා සහ ඔහුගේ හිතවතුන් එක්ව සුජාතාව ගෙල සිරකර ඝාතනය කර ඇත. අනතුරුව ඔවුහු ඇයගේ දේහය ආදාහනය කර සාක්ෂි වසන් කිරීමට උත්සාහ කර තිබේ.
මෙම ඛේදනීය සිදුවීම පිළිබඳව තවදුරටත් විමර්ශන සිදු කෙරේ.
