මෙරට ඩෙංගු රෝග ව්යාප්තිය මේ වන විට වසංගත මට්ටමක් දක්වා වර්ධනය වී ඇති බවත්, රෝගීන්ගේ සහ මරණ සංඛ්යාවේ ඉහළ යාම අතිශය කනස්සල්ලට කරුණක් බවත් සෞඛ්ය කීට විද්යා නිලධාරීන්ගේ සංගමය අනතුරු අඟවයි. ඩෙංගු වසංගත තත්ත්වයක් ඇති විය හැකි බවට විද්යාත්මක පූර්ව පුරෝකථන මීට පෙර ඉදිරිපත් කර තිබුණද, ඊට අදාළ බලධාරීන් සහ අදාළ නිලධාරීන් විසින් නියමිත කාලසීමාව තුළ ගත යුතු වැළැක්වීමේ පියවර අතපසු කිරීම මෙම ශීඝ්ර ව්යාප්තියට ප්රධානතම හේතුව වී ඇත.
ජනවාරි මාසයේ සිට ක්රමයෙන් වර්ධනය වූ ඩෙංගු මදුරු කීට ඝනත්වය පෙන්වන බිටෝ දර්ශකය, අප්රේල් මාසය වන විට බොහෝ ප්රදේශවල සියයට 25ක අගය ඉක්මවා යාම බරපතල තත්ත්වයකි. මෙම දත්ත මගින් පෙන්නුම් කරන්නේ පාලනයෙන් බැහැර වී ඇති මදුරු ගහනය සහ ක්ෂේත්ර මට්ටමින් ක්රියාත්මක විය යුතු මර්දන වැඩසටහන්වල පවතින දුර්වලතාවන් ය. මහජන සෞඛ්ය සුරක්ෂිතභාවය වෙනුවෙන් වහාම මැදිහත් විය යුතු ආයතන නිහඬ පිළිවෙතක් අනුගමනය කිරීම, රෝගය සමාජගත වීමේ වේගය තවදුරටත් උග්ර කර ඇති බව පෙනේ.
මෙම අර්බුදකාරී තත්ත්වය පාලනය නොකළහොත් ඉදිරි සති කිහිපය තුළ රෝහල් පද්ධතියේ ධාරිතාව ඉක්මවා රෝගීන් වාර්තා වීමේ අවදානමක් පවතී. අදාළ වගකිවයුතු අංශ තවදුරටත් ප්රමාදයකින් තොරව ක්ෂේත්ර මට්ටමේ කීට විද්යාත්මක පාලන ක්රමවේදයන් ශක්තිමත් කිරීම සහ මහජනතාව දැනුවත් කිරීමේ වැඩසටහන් කඩිනම් කිරීම අත්යවශ්ය වේ. වසංගතයක් බවට පත්වෙමින් පවතින මෙම තත්ත්වය මර්දනය කිරීම සඳහා ආයතනික මට්ටමින් සහ මහජන සහභාගීත්වයෙන් යුත් ඒකාබද්ධ ක්රියාමාර්ගයක් නොගන්නේ නම්, ඉදිරියේදී සිදුවිය හැකි ජීවිත හානි වළක්වා ගැනීම අසීරු වනු ඇත.
