1990 සුවසැරිය පදනමේ හදිසි වෛද්ය තාක්ෂණික ශිල්පීන්ගේ (EMT) දැනුම, කුසලතා සහ වෘත්තීය නිපුණතා වර්ධනය කිරීමේ අරමුණින් කොළඹ විශ්වවිද්යාලය විසින් හඳුන්වා දුන් ‘පරිපූරක වෛද්ය විද්යාව පිළිබඳ ඩිප්ලෝමා පාඨමාලාව’ අද (22) කොළඹ වෛද්ය පීඨ ශ්රවණාගාරයේදී ආරම්භ කෙරිණි.
සෞඛ්ය නියෝජ්ය අමාත්ය වෛද්ය හංසක විජේමුණි මහතාගේ ප්රධානත්වයෙන් ආරම්භ වූ මෙම පාඨමාලාවේ පළමු කණ්ඩායම ලෙස සුවසැරිය පදනමේ හදිසි වෛද්ය තාක්ෂණික ශිල්පීන් 30 දෙනෙකු පුහුණුව ලබයි.
මාස 06ක කාලයක් පුරා පැවැත්වෙන මෙම පාඨමාලාවට සමගාමීව, ශිල්පීන්ගේ ඉංග්රීසි භාෂා දැනුම ප්රවර්ධනය කිරීමේ විශේෂ වැඩසටහනක් ද ක්රියාත්මක කිරීමට සැලසුම් කර ඇත.
සෞඛ්ය නියෝජ්ය අමාත්යවරයා පැවසුවේ, දිවයිනේ සියලු පළාත් ආවරණය කරමින් ක්රියාත්මක වන සුවසැරිය ගිලන්රථ සේවාව තවදුරටත් පුළුල් හා ගුණාත්මක සේවාවක් ලෙස ප්රවර්ධනය කිරීමට කොළඹ විශ්වවිද්යාලයීය වෛද්ය පීඨය සම්පාදනය කළ මෙම පාඨමාලාව බෙහෙවින් ඉවහල් වන බවයි.ආරම්භයේදී ඉන්දීය රජයේ ප්රදානයක් ලෙස ක්රියාත්මක වූ සුවසැරිය ජාතික හදිසි ගිලන්රථ සේවාව, මේ වන විට ශ්රී ලංකා පාර්ලිමේන්තු පනතකින් බලාත්මක කර ශ්රී ලංකා රජය විසින් සම්පූර්ණයෙන්ම පවත්වාගෙන යනු ලබයි.මෙම අවස්ථාවට කොළඹ විශ්වවිද්යාලයේ උපකුලපති මහාචාර්ය ඉන්දික කරුණාතිලක, වෛද්ය පීඨයේ පීඨාධිපති ජ්යෙෂ්ඨ මහාචාර්ය පූජිත වික්රමසිංහ ඇතුළු සරසවි සහ සුවසැරිය පදනමේ විද්වත් පිරිසක් සහභාගි වූහ.
