ශ්රී ලංකාව ජාත්යන්තර ක්රීඩා සංචාරක කේන්ද්රස්ථානයක් ලෙස ප්රවර්ධනය කිරීමේ අරමුණින් එළඹෙන අගෝස්තු මාසයේදී මෙරට පැවැත්වීමට නියමිත ඓතිහාසික ජාත්යන්තර රග්බි සංචාරයක් සහ ක්රීඩා උත්සවයක් සඳහා තරුණ කටයුතු හා ක්රීඩා අමාත්යාංශයේ පූර්ණ අනුමැතිය සහ සහාය හිමිව තිබේ. අගෝස්තු 22 වනදා සිට 28 වනදා දක්වා සතියක් පුරා පැවැත්වෙන මෙම ක්රීඩා උත්සවයේ සුවිශේෂීම සිදුවීම වන්නේ එංගලන්ත ප්රිමියර් රග්බි තරගාවලිය නියෝජනය කරන ප්රබල ‘නෝර්තැම්ප්ටන් සේන්ට්ස්’ (Northampton Saints) කණ්ඩායම සහ ‘ඒෂියා පැසිෆික් ලයන්ස්’ (Asia Pacific Lions) රග්බි කණ්ඩායම ප්රථම වතාවට ශ්රී ලංකාවේ සංචාරයකට එක්වීමයි.
ලෝක පූජිත රග්බි ක්රීඩකයින් රැසක් සහභාගී වන මෙම සංචාරයේ රග්බි අධ්යක්ෂවරයා ලෙස ඕස්ට්රේලියානු රග්බි පුරාවෘත්තයක් වන ඩේවිඩ් කැම්පේසි කටයුතු කරන අතර, ඕස්ට්රේලියානු හිටපු නායක විල් ජෙනියා ද මේ සඳහා එක්වීමට නියමිතය. මෙම සංචාරයට සමගාමීව අගෝස්තු 23 වනදා ජාත්යන්තර රග්බි තරු සහ ශ්රී ලංකා ප්රවීණ ක්රිකට් ක්රීඩකයින් (Cricket Legends) අතර විශේෂ පුණ්යාධාර විස්සයි-20 ක්රිකට් තරගයක් ද පැවැත්වීමට සංවිධායකයින් සැලසුම් කර ඇත.
මෙම වැඩසටහන හරහා ශ්රී ලංකා ජාතික රග්බි කණ්ඩායමට ජාත්යන්තර පුහුණු අවස්ථා මෙන්ම දේශීය පුහුණුකරුවන් සඳහා අධ්යාපනික වැඩසටහන් ද පැවැත්වේ. මෙම ඓතිහාසික ක්රීඩා උත්සවය අවසන් කරමින් අගෝස්තු 28 වනදා කොළඹ රේස්කෝස් ජාත්යන්තර ක්රීඩාංගණයේදී ප්රධාන රග්බි තරගය පැවැත්වීමට නියමිතය. මෙමඟින් ශ්රී ලංකාව ආරක්ෂිත සහ ආකර්ෂණීය ක්රීඩා සංචාරක ගමනාන්තයක් ලෙස ලෝකය පුරා ප්රවර්ධනය කිරීමටත්, විදේශීය ආයෝජන ආකර්ෂණය කර ගැනීමටත් හැකිවනු ඇතැයි ක්රීඩා අමාත්යාංශය බලාපොරොත්තු වේ.
