මෝටර් රථ ප්රවාහන දෙපාර්තමේන්තුවේ මේ වන විට පත් කර සිටින වැඩ බලන කොමසාරිස් ජනරාල් තාරක දේශප්රිය ගේ මෙහෙයවීම මත එම දෙපාර්තමේන්තුව තුළ සංවිධානාත්මකව සිදුවන බව පැවසෙන දැවැන්ත මුදල් ගනුදෙනු සහ අක්රමිකතා පිළිබඳ තොරතුරු රැසක් අනාවරණය වී තිබේ. ස්ථිර කොමසාරිස්වරයෙකු නොමැති පසුබිමක, පෙර සිටි නිලධාරීන්ටත් වඩා දරුණු අන්දමින් මෙම දූෂණ ක්රියා පවත්වාගෙන යමින්, විශේෂයෙන් සිකුරාදා දිනයන්හිදී නීතිවිරෝධී ලෙස විශාල මුදල් කන්දරාවක් එකතු කර ගන්නා බවට චෝදනා එල්ල වේ.
එම වාර්තාවන්ට අනුව, දෙපාර්තමේන්තුවේ අංශ කිහිපයක් ඔස්සේ මෙම අක්රමිකතා දෛනිකව සිදු කෙරේ:
යතුරුපැදි ලියාපදිංචි කිරීමේ අංශය රාත්රී 10 වන තුරු නීතිවිරෝධී ලෙස පවත්වා ගනිමින් එකතු කරන මුදල් බෙදාගෙන, ඉන් දිනකට ලක්ෂ 05ක පමණ මුදලක් අදාළ ප්රධානියාට ලබා දෙනු ලැබේ.
වෙළඳ වාහන ලියාපදිංචි කිරීමේ අංශය ද රාත්රී 10-11 දක්වා පවත්වා ගනිමින් දිනකට ලක්ෂ 10ක පමණ මුදලක් ඔහු වෙත ලබා දෙන බව වාර්තා වේ.
වෙළඳ වාහන පැවරීමේ අංශයෙන් ද දිනකට ලක්ෂ 03ක පමණ මුදලක් ප්රධානියාට ලැබෙන සේ සැකසූ දූෂණ ජාලයක් ක්රියාත්මක වේ.
මීට අමතරව, අල්ලස් හා දූෂණ විමර්ශන කොමිෂන් සභාව විසින් අත්අඩංගුවට ගත් නිලධාරීන් පවා තවමත් එම අංශවලම සේවය කරමින් ප්රධානියාගේ පූර්ණ රැකවරණය යටතේ අක්රමිකතා සිදු කරන බවත්, විශේෂ අංක ලබා දීමේදී සහ රියදුරු බලපත්ර නිකුත් කිරීමේදී ද බරපතල ගැටලු පවතින බවත් සඳහන් වේ. රජයට ලැබිය යුතු විශාල ආදායමක් මෙලෙස අතලොස්සක් දෙනාගේ සාක්කුවට යන බව පවසන වගකිවයුතු පාර්ශ්ව, මෙම දූෂිත නිලධාරීන් වහාම ඉවත් කර සුදුසු නිලධාරියෙකු පත් කර පිරිසිදු පරිපාලනයක් ස්ථාපිත කරන ලෙස ජනාධිපතිතුමන්ගෙන් ඉල්ලා සිටී.
