ප්රංශයේ ක්රියාත්මක ප්රකට පිරිවැය අඩු ගුවන් සේවයක් වන ෆ්රෙන්ච් බී (French Bee) ආයතනය, එළඹෙන දෙසැම්බර් මාසයේ සිට ශ්රී ලංකාව සහ ප්රංශය අතර සිය ගුවන් ගමන් වාර ආරම්භ කිරීමට තීරණය කර තිබේ. ශීත සෘතු සංචාරක සමය ඉලක්ක කරගනිමින් ආරම්භ කෙරෙන මෙම සේවාව යටතේ, ප්රංශයේ පැරිස් අගනුවර සිට මාලදිවයිනේ මාලේ නුවර හරහා කොළඹ දක්වා සතියකට වට සංචාර දෙකක් බැගින් මෙහෙයවීමට කටයුතු යොදා ඇත.
මෙම නව ගුවන් සේවා මෙහෙයුම මගින් ශ්රී ලංකාවේ සංචාරක ක්ෂේත්රයට නව ප්රාණයක් ලැබෙනු ඇති අතර, අඩු වියදම් ගුවන් ගමන් සේවාවක් හඳුන්වා දීම හරහා විදෙස් සංචාරකයින්ට මෙන්ම ශ්රී ලාංකිකයින්ට ද වඩාත් පහසුවෙන් සහ අඩු වියදමකින් ගමන් කිරීමට අවස්ථාව උදාවනු ඇත. ජාත්යන්තර ගුවන් ගමන් සේවාවන් මෙරටට ආකර්ෂණය කර ගැනීම තුළින් සංචාරක කර්මාන්තයේ වර්ධනයට මෙන්ම රටේ ආර්ථිකයට ද ධනාත්මක බලපෑමක් ඇතිවනු ඇති බවට අපේක්ෂා කෙරේ.
ෆ්රෙන්ච් බී ගුවන් සේවය මගින් ක්රියාත්මක කරන මෙම සේවාව ආරම්භ කිරීමත් සමඟ ගුවන් ගමන් ක්ෂේත්රයේ තරඟකාරීත්වය ඉහළ යන අතරම, මගීන්ට ලබා ගත හැකි ගුවන් ටිකට් පත් මිල ගණන් ද පහළ යනු ඇතැයි ගුවන් සේවා ක්ෂේත්රයේ විශ්ලේෂකයින් පෙන්වා දෙයි. මෙම මෙහෙයුම් දෙසැම්බර් මාසයේ සිට ආරම්භ වන අතර, ඉන් අනතුරුව 2027 වසරේදී තවදුරටත් පුළුල් කිරීම් සිදු කිරීමට ද සැලසුම් කර ඇත. ශ්රී ලංකාවේ ගුවන් සේවා ක්ෂේත්රයේ සිදුවන මෙම වැදගත් වර්ධනය, ජාත්යන්තර ගුවන් ගමන් සිතියමේ ශ්රී ලංකාව තවදුරටත් ස්ථානගත කිරීමට ඉවහල් වනු නොඅනුමානය.
