වත්මන් රජය බලයට පත්වීමෙන් අනතුරුව මත්ද්රව්ය ජාවාරම සහ පාතාල කල්ලි මර්දනය කිරීම ඉලක්ක කර ගනිමින් දැවැන්ත මෙහෙයුම් මාලාවක් ආරම්භ කර ඇති බව ජනාධිපති අනුර කුමාර දිසානායක මහතා ප්රකාශ කරයි. ජනාධිපතිවරයා හෙළි කළ දත්තවලට අනුව, මේ දක්වා හෙරොයින් කිලෝ 3,390ක්, කොකේන් කිලෝ 304ක් සහ අයිස් මත්ද්රව්ය කිලෝ 5,543ක් අත්අඩංගුවට ගැනීමට ආරක්ෂක අංශ සමත්ව තිබේ. මීට අමතරව, මත්පෙති 51,000කට අධික ප්රමාණයක් සහ මත්කරල් 24,000කට අධික ප්රමාණයක් වැටලීම්වලදී සොයාගෙන ඇත.
ගැඹුරු මුහුදේ මත්ද්රව්ය ප්රවාහනය කරන බහුදින යාත්රා අත්අඩංගුවට ගැනීම සඳහා නාවික හමුදාව සුවිශේෂී කාර්යභාරයක් ඉටු කරන බවත්, ගුවන්තොටුපළ සහ වරාය කේන්ද්ර කරගනිමින් ආරක්ෂක විධිවිධාන දැඩි කර ඇති බවත් ජනාධිපතිවරයා පෙන්වා දුන්නේය. මෙම මර්දන ක්රියාවලිය කිසිදු තරාතිරමක් නොබලා සිදු කෙරෙන අතර, පාතාල සාමාජිකයන්, විදේශිකයන්, රාජ්ය නිලධාරීන් මෙන්ම සමාජයේ ගෞරවයට පාත්ර වූ විවිධ ක්ෂේත්රවල පුද්ගලයන් ද ඒ යටතේ අත්අඩංගුවට ගෙන ඇති බව ඔහු වැඩිදුරටත් අවධාරණය කළේය.
කෙසේ වෙතත්, මත්ද්රව්ය ජාවාරම්කරුවන්ට එරෙහි නීතිය ක්රියාත්මක කිරීමට පූර්ණ සහය ලබා දෙන බව ප්රකාශ කරන සමගි ජන බලවේගයේ පාර්ලිමේන්තු මන්ත්රී හර්ෂණ රාජකරුණ මහතා, රජය සිදුකරන මෙම වැටලීම් “මාධ්ය සංදර්ශන” හෝ “චිත්රපට” මෙන් පෙනෙන බවට සැක පළ කරයි. මධ්යම බැංකුවේ ඩොලර් මිලියන 2.5ක සොරකම සහ ගල් අඟුරු ගනුදෙනු වැනි මහා පරිමාණ දූෂණ සම්බන්ධයෙන් නීතිය ක්රියාත්මක නොවීම ප්රශ්න කරන මන්ත්රීවරයා, රජයේ සහන ලබා දීමේ ක්රියාවලිය සහ ඩෙංගු වසංගතය පාලනය කිරීමේදී පවතින අසාර්ථකත්වය පිළිබඳව ද දැඩි විවේචනයක් එල්ල කළේය.
