ශ්රී ලංකාවේ දිස්ත්රික්ක 25න් 19කම බරපතළ ලෙස පවතින අලි-මිනිස් ගැටුම කළමනාකරණය කිරීම සඳහා නව ජාතික ක්රියාකාරී සැලැස්මක් සකස් කිරීමට විද්වත් කමිටුවක් පත්කිරීමට අමාත්ය මණ්ඩල අනුමැතිය හිමිවූ බව පරිසර ඇමැති දම්මික පටබැඳි මහතා ප්රකාශ කළේය. රජයේ ප්රවෘත්ති දෙපාර්තමේන්තුවේ පැවැති මාධ්ය සාකච්ඡාවකදී ඔහු මේ බව සඳහන් කළේය.
මෙම කමිටුව විසින් මාස තුනක් ඇතුළත සිය වාර්තාව සකස් කර ජනාධිපතිවරයා වෙත භාරදීමට නියමිතය. එහිදී 2020 වසරේදී ආචාර්ය ප්රීත්විරාජ් ප්රනාන්දු සහ ආචාර්ය සුමිත් පිලපිටිය වැනි විද්වතුන් විසින් සකස් කරන ලද නමුත් ක්රියාත්මක නොවූ යෝජනා මාලාවද, වත්මන් නව තත්ත්වයන්ට ගැළපෙන පරිදි යාවත්කාලීන කරමින් මෙම නව සැලැස්ම සකස් කෙරේ. නව රජය බලයට පත්වීමෙන් පසු අලි-මිනිස් ගැටුම පාලනය කිරීමේ වැඩපිළිවෙළ පිළිබඳව ශ්රේෂ්ඨාධිකරණය කළ විමසීමට අනුව මෙම පියවර ගෙන තිබේ.
පසුගිය වසර එකහමාරක කාලය තුළ වනාන්තර 86ක් රක්ෂිත ලෙස නම් කිරීම, හම්බන්තොට අලි කළමනාකරණ රක්ෂිතය සඳහා රෙගුලාසි ප්රකාශයට පත් කිරීම සහ තබ්බෝව, කලාවැව වැනි ප්රදේශවල අලින් සඳහා සුපෝෂණ කලාප ඇති කිරීම වැනි පියවර රැසක් දැනටමත් ගෙන ඇති බව ඇමැතිවරයා පැවසීය. මෙම නව කමිටු වාර්තාව ජනාධිපතිවරයාට ඉදිරිපත් කිරීමෙන් පසු ඊට අවශ්ය නීතිමය බලගැන්වීම් සිදුකර අලි-මිනිස් ගැටුම පාලනයට විධිමත් වැඩපිළිවෙළක් දියත් කරන බවද ඔහු වැඩිදුරටත් අවධාරණය කළේය.
