දිවයින පුරා ඩෙංගු රෝගීන් වාර්තා වීම ශීඝ්රයෙන් ඉහළ ගොස් ඇති අතර, මේ වන විට සමස්ත රෝගීන් සංඛ්යාව 54,189ක් දක්වා ඉහළ ගොස් ඇති බව ඩෙංගු මර්දන ඒකකයේ අධ්යක්ෂ කපිල කන්නංගර මහතා පවසයි. පසුගිය පැය 24 තුළ පමණක් අලුතින් රෝගීන් 1,030 දෙනෙකු වාර්තා වී ඇති අතර, දෛනිකව රෝගීන් 950ත් 1,000ත් අතර ඉහළ යෑමක් මේ දිනවල දක්නට ලැබේ.
මේ හේතුවෙන් රෝහල්වල ධාරිතාවද උපරිම මට්ටමකට පැමිණ ඇති අතර, රෝගීන් රැකබලා ගැනීමට රෝහල් කාර්ය මණ්ඩලය දැඩි වෙහෙසක් දරමින් සිටියි. පවතින වර්ෂාපතනය සහ පසුගිය නිවාඩු දිනවල පැවැති දන්සල්/උත්සව අවස්ථාවලදී වගකීම් විරහිත ලෙස ප්ලාස්ටික් හා පොලිතින් පරිසරයට මුදාහැරීම හේතුවෙන් මදුරුවන් බෝවීම වැඩි වී ඇති බව අධ්යක්ෂවරයා පෙන්වා දෙයි. එවැනි පුද්ගලයන්ට එරෙහිව තරාතිරම නොබලා දැඩිව නීතිය ක්රියාත්මක කරන බවද ඔහු සඳහන් කළේය.
කනගාටුදායක ලෙස මේ වන විට ඩෙංගු මරණ 31ක් වාර්තා වී ඇත. වෛද්ය පරීක්ෂණ ආයතනයේ (MRI) දත්තවලට අනුව මෙවර රෝගීන්ගෙන් 50%ක්ම ගොදුරු වී ඇත්තේ ශරීරයේ ප්රතිශක්තිය වේගයෙන් අඩු කරන ‘ඩෙංගු වෛරස ප්රභේද 2’ (DEN-2) තත්ත්වයටයි. වසංගත තත්ත්වයක් වළක්වා ගැනීම සඳහා තමන්ට රෝගය වැලඳෙන තෙක් නොසිට, වහාම අවට පරිසරය පවිත්ර කිරීමට උපරිම සහයෝගය දෙන ලෙස ඩෙංගු මර්දන ඒකකය මහජනතාවගෙන් දැඩිව ඉල්ලා සිටියි.
