ඇමෙරිකානු ජනාධිපති ඩොනල්ඩ් ට්රම්ප්ගේ පරිපාලනය විසින් නේටෝ (NATO) සංවිධානයේ පැවැත්ම සහ වටිනාකම ප්රශ්න කරමින් සිටින පසුබිමක, උතුරු කැරොලිනා (North Carolina) වෙරළට ඔබ්බෙන් වූ මුහුදේදී ඇමෙරිකාව ප්රමුඛ කරගත් නේටෝ සාමාජික රටවල දැවැන්ත ඒකාබද්ධ නාවික යුද අභ්යාසයක් (FLEETEX 250) ආරම්භ කර තිබේ. ඇමෙරිකාවේ 250 වැනි සංවත්සරයට සමගාමීව මෙම අභ්යාසය සංවිධානය කර ඇත.
නේටෝවේ වැය බරෙන් වැඩි ප්රමාණයක් ඇමෙරිකාව දැරීම පිළිබඳව ජනාධිපති ට්රම්ප් දිගින් දිගටම විරෝධය පළ කර ඇති අතර, ඉරානය සමඟ පවතින ගැටුමේදී බ්රිතාන්යය, ස්පාඤ්ඤය, ජර්මනිය සහ ප්රංශය වැනි රටවල් ඇමෙරිකාවට ප්රමාණවත් සහයෝගයක් ලබා නොදුන් බව පවසමින් පසුගියදා ඕවල් කාර්යාලයේ (Oval Office) පැවැති හමුවකදී ද ට්රම්ප් සිය අප්රසාදය පළ කර තිබුණි. එසේම ඇමෙරිකානු ආරක්ෂක ලේකම් පීට් හෙග්සෙත් (Pete Hegseth) විසින් යුරෝපයේ සිටින ඇමෙරිකානු හමුදා ප්රමාණය අඩු කිරීමේ හය මසක සමාලෝචනයක් ද ප්රකාශයට පත් කර ඇත. ඉරාන මෙහෙයුම් සඳහා තම ගුවන් කලාපය භාවිතා කිරීමට ඉඩ නොදීම හේතුවෙන් ස්පාඤ්ඤය නේටෝ සංවිධානයෙන් තාවකාලිකව ඉවත් කිරීමට පවා ඇමෙරිකානු ආරක්ෂක අංශ මීට පෙර අභ්යන්තරිකව සාකච්ඡා කර තිබුණි.
කෙසේ වෙතත්, දේශපාලන මට්ටමින් පවතින මෙම උණුසුම්කාරී තත්ත්වය නොතකා, බ්රිතාන්යය, නෝර්වේ, ජර්මනිය, බෙල්ජියම, ඩෙන්මාර්කය, නෙදර්ලන්තය, තුර්කිය, ප්රංශය සහ ස්පාඤ්ඤය වැනි රටවල නාවික සහ මැරීන් බලකායන් ඇමෙරිකානු හමුදාවන් සමඟ එක්ව මෙම සබ්මැරීන් නාශක සහ නැව් වැටලීම් පිළිබඳ ඒකාබද්ධ අභ්යාසයන් සාර්ථකව සිදු කරමින් පවතී. හමුදා මට්ටමේ පවතින මෙම සහයෝගිතාවය ඉතා ශක්තිමත් වුවද, ඉදිරියේදී ඇමෙරිකාව සිය හමුදා දායකත්වය අඩු කළහොත් මෙවැනි ඒකාබද්ධ අභ්යාසයන් සීමා වනු ඇති බව ආරක්ෂක විචාරකයෝ පවසති.
තොරතුරු උපුටා ගැනීම: Reuters ඇසුරින්
