දැනට සියයට 5ක මට්ටමේ පවතින මෙරට ආර්ථික වර්ධනය ඉදිරි වසරවලදී සියයට 7ත් 8ත් අතර මට්ටමක් දක්වා ඉහළ නැංවීමට වෙහෙසිය යුතු බව ජනාධිපති අනුර කුමාර දිසානායක මහතා පවසයි. එම ගමනේදී තොරතුරු තාක්ෂණ, විදුලි හා ඉලෙක්ට්රොනික ක්ෂේත්රයන්හි පුළුල් දායකත්වයක් අපේක්ෂා කරන බව ජනාධිපතිවරයා සඳහන් කළේය.
ජනාධිපතිවරයා මේ බව ප්රකාශ කළේ තොරතුරු තාක්ෂණ, විදුලි හා ඉලෙක්ට්රොනික ක්ෂේත්රයන්හි ප්රමුඛ පෙළේ සංගම්, කර්මාන්තකරුවන් සහ ආයෝජකයන් සමඟ අද (01) පෙරවරුවේ ජනාධිපති කාර්යාලයේ පැවති සාකච්ඡාවකට එක්වෙමිනි.
රටේ අනාගතය සුරක්ෂිත කළ හැක්කේ දේශීය කර්මාන්තකරුවා ශක්තිමත් කිරීමෙන් බව පෙන්වා දුන් ජනාධිපතිවරයා, රටේ පවතින සැබෑ විභවතාව ජය ගැනීමට රජය සමඟ අත්වැල් බැඳගන්නා ලෙස සියලුම ව්යවසායකයන්ට ආරාධනා කළේය. එමෙන්ම ක්ෂේත්රයේ දැනට මතුව ඇති ගැටලු පිළිබඳ වාර්තාවක් සහ යෝජනාවලියක් හැකි ඉක්මණින් ඉදිරිපත් කරන ලෙස ද එතුමා ඉල්ලා සිටියේය.
මෙරට ආර්ථීක වර්ධනය වේගවත් කිරීම වෙනුවෙන් ලබන වසරේදී ප්රාග්ධන වියදම් ලෙස රුපියල් ට්රිලියන 2ක් වෙන් කිරීමට අපේක්ෂා කරන බවත්, එමගින් ඇතිවන ඩොලර් ඉල්ලුම පියවා ගැනීමට අපනයන ක්ෂේත්රයේ දායකත්වය උපරිමයෙන් අපේක්ෂා කරන බවත් ජනාධිපතිවරයා මෙහිදී වැඩිදුරටත් ප්රකාශ කළේය.
දැනට ලංකාවේ පවතින තුන්වන විශාලතම අපනයන ආදායම් ක්ෂේත්රය වන තොරතුරු තාක්ෂණ ක්ෂේත්රය මගින් වසරකට ඩොලර් බිලියන 5ක අපනයන ආදායමක් සහ දැනට ඩොලර් මිලියන 500ක් පමණ වන විදුලි හා ඉලෙක්ට්රොනික ක්ෂේත්රයේ අපනයන ආදායම ඩොලර් බිලියන 2ක් දක්වා ඉහළ නැංවීමේ විභවතාව පවතින බව මෙම සාකච්ඡාවේදී අනාවරණය විය. කර්මාන්තකරුවන්ගේ ගැටලුවලට කඩිනම් විසඳුම් ලබා දීම සඳහා විශේෂ ඒකකයක් ස්ථාපිත කිරීමට ද මෙහිදී අවධානය යොමු කෙරිණි.
මෙහිදී අදහස් දැක්වූ ඩිජිටල් ආර්ථික නියෝජ්ය අමාත්ය එරංග වීරරත්න මහතා සඳහන් කළේ, වරාය නගරය ආශ්රිත සමාගම්වල බැංකු බාධා, තාක්ෂණික කොටස් ආනයනයේදී පවතින රේගු බාධා ඉවත් කිරීමට “Green Channel” ක්රමවේදයක් හඳුන්වා දීම සහ ක්ෂේත්රයේ වෘත්තිකයන් විදේශගත වීම වැළැක්වීම සඳහා විකල්ප සහන ලබා දීමට රජයේ අවධානය යොමු වී ඇති බවයි.
