නායයෑම් අවදානමට ලක්ව ඇති පවුල් සහ නුවරඑළිය දිස්ත්රික්කයේ ජනතාව නැවත පදිංචි කිරීම සඳහා වසර 7ක විධිමත් සැලැස්මක් සකස් කරන ලෙස ජනාධිපති අනුර කුමාර දිසානායක මහතා නිලධාරීන්ට උපදෙස් ලබා දී තිබේ. ජනාධිපති ලේකම් කාර්යාලයේදී පැවැති ව්යසන කළමනාකරණ ජාතික සභා රැස්වීමේදී ජනාධිපතිවරයා මෙම නියෝගය නිකුත් කළේය.
මීට අමතරව ඉදිරියේදී ඇති විය හැකි ‘එල් නිනෝ’ (El Niño) දේශගුණික බලපෑම හමුවේ කෘෂිකර්මාන්තය, පානීය ජල සැපයුම සහ බලශක්ති අංශ මුහුණ දිය යුතු ආකාරය පිළිබඳව ද මෙහිදී විශේෂ අවධානයක් යොමු විය. වනජීවී කලාපවල වැව් කඩිනමින් ප්රතිසංස්කරණය කිරීමටත්, සූර්ය බලශක්තිය ගබඩා කිරීමට අවශ්ය බැටරි ගෙන්වීම කඩිනම් කිරීමටත් ජනාධිපතිවරයා අදාළ අමාත්යාංශ වෙත උපදෙස් දුන්නේය.
ආපදා කළමනාකරණ මධ්යස්ථානය (DMC) සහ ආපදා සහන සේවා මධ්යස්ථානය (NDRSC) ඒකාබද්ධ කර වඩාත් කාර්යක්ෂම කිරීමටත්, පවතින සංකීර්ණ ඉඩම් පනත් 5 සමාලෝචනය කර තනි ඒකාබද්ධ ඉඩම් පනතක් සකස් කිරීමටත් මෙහිදී යෝජනා විය. මෙම සාකච්ඡාවට සහභාගී වූ විපක්ෂ නායක සජිත් ප්රේමදාස මහතා දේශගුණික විපර්යාස පිළිබඳ පාර්ලිමේන්තු සංසදය මඟින් සකස් කළ යෝජනාවලියක් සභාවට ඉදිරිපත් කළ අතර, නව පනත් සංශෝධනයේදී එම යෝජනා ද සලකා බැලීමට ජනාධිපතිවරයා එකඟතාව පළ කළේය.
