ශ්රී ලංකා මහ බැංකුවෙන් ඉවත් කොට මුදල් අමාත්යාංශයට පවරා ඇති රාජ්ය ණය කළමනාකරණ කාර්යාලයේ ධාරිතාව කඩිනමින් ඉහළ නැංවිය යුතු බව ජාත්යන්තර මූල්ය අරමුදල (IMF) පෙන්වා දෙයි. ශ්රී ලංකාව ජාත්යන්තර ප්රාග්ධන වෙළෙඳපොළ වෙත නැවත ප්රවේශ වීම සඳහා මෙම පියවර අත්යවශ්ය බව දූත මණ්ඩල නායක එවන් පපාජෝජෝ මහතා සඳහන් කරයි.
පසුගිය ජූනි 24 සිට 30 දක්වා මෙරට සංචාරයක නිරත වූ IMF දූත කණ්ඩායම විසින් මෙම කරුණු අවධාරණය කරනු ලැබීය. මෙරට සාර්ව ආර්ථික වර්ධනයන් සහ විස්තීර්ණ ණය පහසුකම (EFF) යටතේ ක්රියාත්මක වන ප්රතිසංස්කරණවල ප්රගතිය පිළිබඳව මෙහිදී විශේෂ අවධානය යොමු විය.
මැදපෙරදිග කලාපයේ පවතින යුදමය වාතාවරණය හේතුවෙන් බලශක්ති මිල ඉහළ යෑම සහ උද්ධමනය 1.6% සිට 5.5% දක්වා ඉහළ යෑම වැනි අභියෝග මධ්යයේ වුවද, රජය ගත් කඩිනම් පියවර ජාත්යන්තර මූල්ය අරමුදලේ ඇගයීමට ලක්ව තිබේ. 2027 වසරේදී දළ දේශීය නිෂ්පාදිතයෙන් 2.3%ක ප්රාථමික ශේෂයක් අත්කර ගැනීම සඳහා බදු පදනම පුළුල් කිරීම, බදු අනුකූලතාව ඉහළ නැංවීම සහ රාජ්ය ව්යවසාය ප්රතිසංස්කරණ වේගවත් කිරීමේ වැදගත්කම ද මෙහිදී පෙන්වා දී ඇත.
ජනාධිපති අනුර කුමාර දිසානායක මහතා ඇතුළු රජයේ ඉහළ පෙළේ නිලධාරීන් සමඟ සාකච්ඡා පැවැත්වූ දූත කණ්ඩායම වැඩිදුරටත් කියා සිටියේ, ශ්රී ලංකාවේ ආර්ථික වැඩසටහනේ හත්වැනි සමාලෝචනය 2026 සැප්තැම්බර් සහ නොවැම්බර් අතර කාලයේදී සිදු කිරීමට නියමිත බවයි.
